Երաշխիքներ են տրվել
ՀՀԿ-ՀՅԴ քաղաքական համագործակցության հուշագիրը կենացների եւ ցանկությունների ժողովածու է հիշեցնում, որտեղ կողմերը համատեղ պատասխանատվություն են ստանձնում երկրի կառավարման գործում, պարտավորվում են Ընտրական նոր օրենսգրքով և Հանրաքվեի մասին նոր օրենքով երաշխավորել ազատ, հանրության համար վստահելի ընտրությունների և հանրաքվեների կազմակերպում ու անցկացում, ազատ, արդար դատական համակարգի ձեւավորում, տնտեսական քաղաքականության հիմքում դնել սոցիալական շուկայական կողմնորոշումը, կառուցվածքային բարեփոխումների միջոցով բարձրացնել Հայաստանի տնտեսության մրցունակության աստիճանը, ժողովրդագրական եւ դեմոգրաֆիական խնդիրներին լուծումներ գտնել, նպաստել բնակչության աճին եւ այլն, եւ այլն: Հուշագրի հիմքը, ինչպես նշվում է փաստաթղթում, Սերժ Սարգսյանի փետրվարի 12-ի ելույթն է, նշվում է, որ համաձայնագիրը կնքվում է՝ հիմք ընդունելով Սերժ Սարգսյանի փետրվարի 12-ի ելույթում արծարծված մոտեցումները: Այսինքն, համագործակցության հիմքում ոչ թե կառավարության ծրագիրն է, այլ Սերժ Սարգսյանի հռչակած թեզերը: Սա ուշագրավ է այն առումով, քանի որ ՀՅԴ-ականները լծակներ են ստացել հենց Գործադիրում, ասել է թե, նրանց գործունեության հիմքում կառավարության ծրագրերը պետք է լինեն, մինչդեռ այս արձանագրումով դաշնակցական ընկերները հստակ հայտարարում են, որ կատարելու են միայն նախագահի հրահանգները եւ նրա կարգադրությունները: Մյուս կողմից՝ այլ տարբերակ հնարավոր չէ, ՀՅԴ-ն ինչպես պետք է կատարի կառավարության ծրագիրը,բյուջեն, որին հերոսաբար բոյկոտեց, ՀՅԴ-ականները չքվեարկեցին Հովիկ Աբրահամյանի կառավարության ներկայացրած բյուջեին: Հուշագրով, ուշագրավ է, որ ապահարզանը նախատեսված է առանց ավելորդ քաշքշուկների, գլխացավանքների․ «Անհաղթահարելի տարաձայնությունների առաջացման դեպքում կուսակցություններից յուրաքանչյուրը, մյուս կողմին գրավոր տեղեկացնելով, կարող է դադարեցնել քաղաքական համագործակցությունը», ամրագրված է փաստաղթում, որից կարելի է եզրահանգել, որ պատեհ պահին ՀՅԴ-ին կգործուղեն ընդդիմադիր դաշտ: Այն, որ բոլոր կոալիցիոն հուշագրերն էլ գեղեցիկ ցանկությունների շտեմարան են հիշեցրել, որոնք, սակայն, որպես կանոն մնացել են թղթի վրա, կփաստեն բոլորը: Սակայն դաշնակցական ընկերները խորհրդարանում հակադարձում էին նման հարցադրումներին:«Ուշադիր ընթերցման դեպքում դուք կտեսնեք այնտեղ բազմաթիվ անելիքներ, կոնկրետ կետեր, որոնք վերաբերում են և հասարակական, քաղաքական ոլորտին և տնտեսական ոլորտին: Ես վստահ եմ, որ առաջիկայում ականատես կլինեք այդ ուղղությամբ անելիքներին»,-խորհրդարանում լրագրողների հետ զրույցում ասաց ՀՅԴ խմբակցության քարտուղար Աղվան Վարդանյանը՝ հուշագրում կոնկրետ ոչինչ չլինելու դիտարկմանն ի պատասխան: Հուշագրի ամենակարևոր կետերից մեկը Վարդանյանը համարում է այն, որ բոլոր ռազմավարական խնդիրները պետք է կողմերի միջև քննարկվեն եւ համաձայնվեցվեն: Բացի այդ, կառավարությանը, ԱԺ-ին վերաբերող ցանկացած հարց, կողմերից մեկի առաջարկությամբ կարող է դրվել քննարկման. «Այնպես որ, բազմաթիվ կոնկրետ կետեր կան և մենք անդրադառնալու ենք նաև կառավարության ծրագրերին: Մենք պատասխանատվություն ենք ստանձնում կառավարության ծրագրերի համար»: Արմեն Ռուստամյանն էլ վստահեցնում էր, որ Դաշնակցությանը տրվել են երաշխիքներ, որ այդ կետերը կիրագործվեն եւ երաշխիքների մի մասը ցանկություն ունեցողը կտեսնի այդ հուշագրում: Անի Սահակյան
Հետևեք մեզ Viber-ում
