Նիկոլը գերիշխում է օրակարգերի և կոլեկտիվ հիշողության տիրույթներում․ Կարեն Վրթանեսյան
Ռազմական փորձագետ Կարեն Վրթանեսյանը ֆեյսբուքյան իր էջում գրում է․ «Այսօր լրացավ 6 տարին, ինչ Նիկոլը կազմակերպեց և իրագործեց Ազգային ժողովի շրջափակումն, իսկ այնուհետև նաև ամբոխի ներխուժումը ԱԺ տարածք և, ըստ էության, պատգամավորներին հաշվեհարդարով սպառնալով՝ փաստացի ցրեց խորհրդարանը։
Ուղիղ եմ ասում «կազմակերպեց և իրագործեց», որովհետև բացի այն փաստից, որ նա անձամբ էր այնտեղ՝ ելույթներ ունենալով ու բարձրախոսը ձեռքին հրահանգներ տալով, կա ևս մի դրվագ, որ այն ժամանակ աննկատ մնաց. ներխուժումից մոտ 2 շաբաթ առաջ՝ 2018 թվականի սեպտեմբերի 21-ին, Կարապի լճի մոտ Հայկոյի նախընտրական քարոզարշավի եզրափակիչ միտինգին, Նիկոլը շատ թափանցից ակնարկ էր արել, թե. «ԱԺ դարպասները պետք է բացվեն ժողովրդի առաջ»։
Զարմանալիորեն, վերջին 1–2 տարիներին այս մասին ում հետ խոսում եմ, պարզվում է, որ Նիկոլի ծանր հանցագործությունների շարքից այս դրվագի մասին մեծամասնությունը մոռացել է։ Մարդիկ անցնում են ԱԺ-ի զոդած դարպասների մոտով ու մեծ մասը ոչ մի բան չի հիշում։
Հաճախ եմ կրկնում, որ Նիկոլը գերիշխում է օրակարգերի և կոլեկտիվ հիշողության տիրույթներում։ ԱԺ ներխուժումը մոռանալը իմ պնդումը հաստատող ևս մեկ օրինակ է. կոլեկտիվ հիշողությունից ջնջված է նիկոլական օկուպացիոն վարչակարգի ամենամեծ հանցագործություններից մեկը։
Սա այն իրադարձություններից է, որոնց մասին անպայման և անդադար պետք է հիշեցնել, որպեսզի կոլեկտիվ հիշողությունից դուրս չմղվի։
Հ.Գ. Հետաքրքիր է, որ ներխուժման պահի լուսանկարներ էլ գրեթե չեն պահպանվել համացանցում, հատուկենտ ֆոտոներ գտա, որտեղ երևում էր, որ նիկոլանք և իրենց մարդիկ ԱԺ տարածքում են»։
© ORAGIR.NEWS https://oragir.news/hy/material/2024/10/02/131440