Ահազանգ. Խաչատուր Սուքիասյանին պատկանող Flyone ընկերության ինքնաթիռը եղել է անսարք
Քիչ առաջ ահազանգ ենք ստացել, որ այսօր Խաչատուր Սուքիասյանին պատկանող Flyone ընկերության ինքնաթիռը, որը պետք է Միլանից վերադառնար Երևան, եղել է անսարք. այդ պատճառով Իտալիայի օդանավակայանը թույլ չի տալիս թռիչք կատարել և վերադառնալ Հայաստան։ Այս պահին ավելի քան 130 ուղևոր մնացել է Միլանում։
Ավիաընկերությունը, որը պարտավոր է ուղևորների համար համապատասխան պայմաններ ապահովել, մինչ խնդիրները կլուծվեն, հայտարարել է, որ տրանսֆեր չի լինելու, և առաջարկել է ուղևորներին իրենց հաշվին Միլանից մեկնել Ֆրանկֆուրտ կամ Փարիզ և այնտեղից վերադառնալ Երևան. կամ սպասել մինչև ամսի մեկը, երբ միգուցե անսարքությունը լուծված կլինի, և նրանք կկարողանան վերադառնալ Երևան։ Ընկերությունը անգամ չի քննարկում նոր, սարքին ինքնաթիռ ուղարկելու հարցը։
Ավելի ուշ պարզ է դարձել, որ ինքնաթիռը դեռ Երևանում է ունեցել անսարքություն։ Այս պահին օդանավակայանի աշխատակիցները ստանձնել են պատասխանատվություն ուղևորներին մեկ օրով տեղավորել հյուրանոցում և խոստացել, որ թռիչքը դեպի Երևան տեղի կունենա վաղը երեկոյան։
Ի դեպ, Flyone ընկերությունում նման դեպքն առաջին անգամ չէ։ Ընկերության կայքը ուսումնասիրելուց հետո պարզվեց, որ բազմաթիվ օգտատերեր դժգոհություն են հայտնել ընկերության աշխատանքի վերաբերյալ։
Հետևեք մեզ Viber-ում
