Ինչպե՞ս պարզել, թե որ կետից են ղեկավարվում իշխանությունը և ընդդիմությունը․ Կարեն Հեքիմյան
Կարեն Հեքիմյանը Ֆեյսբուքի իր էջում գրում է․
«Ինչպե՞ս պարզել, թե աշխարհաքաղաքական որ կետից է ղեկավարվում երկրի իշխանությունը կամ ընդդիմությունը: Դա պարզելու համար կա շատ պարզ տարբերակ:
Եթե իշխանությունը կամ ընդդիմությունը խոսում է «արտաքին ուժեր»-ից կամ պետությունն աշխարհի քարտեզից «ջնջելու» ինչ-որ մեկի հավակնության մասին, ապա մեծ է հավանականությունը, որ այդ իշխանությունը կամ ընդդիմությունը ղեկավարվում է Ռուսաստանից: Անշուշտ, չի կարելի պնդել, որ սա աքսիոմ է, սակայն վստահ եմ` թեորեմ է:
Այդ թեորեմը հերթական անգամ ապացուցվեց Վրաստանում:
Ուրեմն, Վրաստանի դե ֆակտո ղեկավար Իվանիշվիլին Բիձինան հայտարարեց, որ «արտաքին ուժերը ցանկանում են ընդդիմության օգնությամբ ջնջել Վրաստանը աշխարհի քարտեզից»: Սա տիպիկ ռուսական ձեռագիր է:
Փորձը ցույց է տալիս, որ ռուսական ազդեցության ներքո գտնվող իշխանությունների, ընդդիմությունների և անհատների վերջին «հանգրվանը» «արտաքին ուժերն են» և «աշխարհի քարտեզը»: Եթե վերջացել է «երազանքի» կուտը, ապա այլ տարբերակ վերջիններիս զինանոցում չկա: Այս իմաստով, հիշեք Բելառուսը, Ղազախստանը, Պեսկովին, Զախարովային: Ի վերջո, եկեք հիշենք, թե վերջին տարիներին ինչով ենք զբաղվում մենք: Հիշեցնեմ` վերջին տարիներին թե՜ իշխանության, թե՜ ընդդիմության կողմից մեզ ներշնչում են, որ կան «արտաքին ուժեր», «ագենտներ», որոնք ցանկանում են Հայաստանը ջնջել «աշխարհի քարտեզից»:
Այժմ վերհիշենք, թե վերջին 100 տարում որ պետություններն են «ջնջվել» քարտեզից: Մի քանի րոպեում կարելի մտաբերել շուրջ 50-60 պետություն, որոնք վերջին 100 տարում գոյացել են «աշխարհի քարտեզի» վրա: Սակայն քարտեզից ջնջված պետություններ չկան:
Բացի դրանից` որո՞նք են «արտաքին ուժերը»: Սովորաբար, գոնե Հայաստանում, ասելով «արտաքին ուժեր», բնակչության զգալի մեծամասնությունը հասկանում է, որ խոսքը գնում է «արևմտյան կողմնորոշում» ունեցող ուժերի մասին: Այժմ եկեք վերհիշենք, թե աշխարհում քանի երկիր են «ջնջել» «արևմտյան կողմնորոշում» ունեցող ուժերը: Օրինակ` քանի՞ պետություն է աշխարհի երեսից վերացրել Արևմուտքի դե յուրե բնօրրան-պետություն Բելգիան կամ դե ֆակտո առաջնորդ ԱՄՆ-ն: Այդպիսի պետություններ չկան:
Եվ, ուրեմն, եկեք միշտ հիշենք մի թեորեմ, այն է` եթե երկրի իշխանությունը կամ ընդդիմությունը խոսում է «արտաքին ուժեր»-ից կամ պետությունն «աշխարհի քարտեզից ջնջվելու» մասին, ապա այդ իշխանությունը կամ ընդդիմությունը ղեկավարվում է Ռուսաստանից»:
Հետևեք մեզ Viber-ում
