Հայկազի 9 ամյա եղբայրը չի համակերպվում. սպանված կուրսանտի ընտանիքը հավատում է

«Հայկազից հետո մենք սարսափելի ծանր վիճակում հայտնվեցինք: Կինս դեռ ուշքի չի գալիս: Անընդհատ գլխացավեր ու առողջական խնդիրներ ունի»,- Հայելի.am-ի թղթակցի հետ զրույցում ասաց Վազգեն Սարգսյանի անվան ռազմական ինստիտուտում 2015թ. հունվարին դաժանաբար սպանված կուրսանտ Հայկազ Բարսեղյանի հայրը՝ Արկադի Բարսեղյանը: Արկադի Բարսեղյանը նշեց, որ երեկ՝ փետրվարի 25-ին,  նախատեսված դատը չի կայացել փաստաբաններից մեկի բացակայության պատճառով: «Կինս շարունակ դեղեր է ստանում: Հայկազը ունի նաև կրտսեր եղբայրներ: Ամենափոքրը ՝ Դավիթը, որը 9-ը տարեկան է շատ կապված էր եղբորը: Նա կնոջս հետ միասին պետք է առողջարան գնա: Մեր ցավը սարսափելի է, բայց մենք հավատում ենք արդարադատությանը:Ուղղակի հասկացեք մեզ՝  Գնելի փաստաբանը պնդում է, որ Հայկազը ինքնասպան է եղել: Ամեն անգամ այդ խոսակցությունները լսելը ծանր է: Փորձում եմ կնոջս հեռու պահել, բայց չի ստացվում»,-ընդգծեց Արկադի Բարսեղյանը: Հիշեցնենք, հունվարի 29-ին՝ ժամը 06:35-ի սահմաններում, հայտնաբերվել էր Հայկազ Բարսեղյանը՝ պտտաձողի վրա պարանով կախված վիճակում: ՀՀ քննչական կոմիտեում հարուցված քրեական գործով մեղադրանք է առաջադրվել Հ. Բարսեղյանի 4 համածառայակցի: Նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Դեպքից հետո հարուցվել է նոր քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով: Աստղիկ Ավագյան