ԱԺ խոսնակը մի հարցում ճիշտ է

ՔՊ-ից կարծում էին, որ երկրում ընդդիմադիրներին անտեսելով , շարունակելու են միայն բառերով երկիրը ժողովրդավար կոչել միջազգային հարթակներում, Կանադայից, սակայն, առաջին ապտակն են ստացել

«Փաստինֆո»-ի աղբյուրները փաստում են, որ միջազգային հարթակներում արդեն նկատում են խիստ «ժողովրդավար» ներկայացող ՀՀ ղեկավարության հակաժողովրդավարական քայլերը, որն առավել ցցուն դրսեւորում է ստանում, այսպես կոչված, խորհրդարանական դիվանագիտության մեջ։

ԱԺ ղեկավարությունը պատվիրակությունները ձեւավորելու հիմնականում ստվերում է ընդդիմությանը եւ կազմը ձեւավորվում է իշխանական պատգամավորներից, ինչն այնքան էլ ընկելելի չէ հատկապես արեւմուտքի համար։ Որքան էլ արեւմտյան երկրները փորձում են աչք փակել ՀՀ իշխանությունների կոռուպցիոն քայլերի, բռնաճնշումների վրա, այդուհանդերձ, իշխանության որոշ քայլեր անհետեւանք չեն մնում, որի դրսեւորումներից մեկն էլ Ալեն Սիմոնյանի՝ Կանադա նախատեսված այցի չեղարկումն է։

Ճիշտ է, ԱԺ նախագահի խոսնակը հայտարարել է, թե այցի չեղարկման պատճառը Կանադայի ներքաղաքական լարված վիճակն է, բայց, մեր աղբյուրների փոխանցմամբ, առանցքային պատճառը եղել է հայկական համայնքի բոյկոտը։ Կանադայի խորհրդարանականները ուսումնասիրել են պատվիրակության կազմը, որի մեջ ընդգրկված չի եղել անգամ Հայաստան-Կանադա բարեկամական խմբի ղեկավարը, քանզի վերջինս ոչ միայն ընդդիմադիր է, այլեւ Փաշինյան հրաժարականը պահանջող ակցիաների հիմնական նախաձեռնողը, խոսքը Իշխան Սաղաթելյանի մասին է։

Մի հարցում ԱԺ նախագահի խոսնակն անկեղծ է՝ այցի չեղարկումը բխել է կանադական կողմից ու հենց վերջիններիս նախաձեռնությամբ էլ տեղի է ունեցել հեռախոսազրույցը, որի ընթացքում Սիմոնյանին տեղեկացրել են այցը հետաձգելու անհրաժեշտության մասին։

Աղբյուր` Փաստինֆո