Կութի բնակիչները ադրբեջանցիների կողմից հափշտակված անասունների դիմաց փոխհատուցումը ստացել են 70 տոկոսի չափով

Ադրբեջանական ագրեսիայի հետեւանքով Գեղարքունիքի մարզի Կութ համայնքի բնակիչների կորցրած անասունների դիմաց կառավարությունը փոխհատուցում է տվել 70 տոկոսի չափով։

Հիշեցնենք, որ դեռեւս 2021 թվականին, ադրբեջանցիները Գեղարքունիքի մարզում օկուպացնելով մի շարք տարածքներ, նաեւ հափշտակել էին գյուղացիների խոշոր եղջերավոր անասունները՝ մոտ 80 գլուխ։

Ադրբեջանցիներն, իհարկե, այդպես էլ չվերադարձրեցին գողոնը, իսկ ՀՀ իշխանության համար էլ տարիներ պահանջվեց փոխհատուցում տալու համար։

Կութի վարչական ղեկավար Գրիգորի Ավակյանը «Փաստինֆո»-ին հայտնեց, որ գյուղացիները փոխհատուցում ստացել են՝ անասունի ինքնարժեքի միջին գնի 70 տոկոսի չափով։

Նրա փոխանցմամբ՝ ստացված փոխհատուցմամբ ոչ բոլորն են նորից գնել անասուններ, քանի որ գյուղում արդեն վտանգավոր է անասուն պահելը, արոտավայրեր չկան։

«Արոտավայրերի հարց ունենք, շատ հեռանալ արածեցնել չեն կարող, վտանգավոր է կյանքի համար, թշնամին մոտ է, բնակիչներ եղան, որ այդ փոխհատուցումը ուղղեցին վարկերի մարմանը (գյուղացիներից ոմանք վարկերով էին ձեռք բերել խոշոր եղջերավոր անասուններին, որոնք հափշտակել էին ադրբեջանցիները- խմբ), ոմանք էլ դեռ հույսները չեն կորցրել ու նորից գնեցին»,- «Փաստինֆո»-ին ասաց Ավակյանը։ Վերջինս խուսափեց ասել, թե սահմանամերձ դարձած Կութում հիմա քանի գլուխ անասուն կա՝ դա համարելով ռազմավարական թիվ։ Փոխարենը նշեց, որ անասուններին հեռու չեն տանում արածեցնելու, նաեւ հողագործությամբ են զբաղվում, այնքանով որքանով հող է մնացել այս պահին։

«Գիտե՛ք, մեր տարածքներից և՛ արոտավայրեր, ՛և վարելահողեր անցել են ադրբեջանական ուժերի վերահսկողության տակ»,- ասաց Կութի վարչական ղեկավարը։

Աղբյուր` Փաստինֆո