Թուրքիան կոչ է անում անկախ ծրագրային ապահովում մշակել Լիբանանում դիվերսիաների ֆոնին
Անկախ ծրագրային ապահովումը Թուրքիայի համար ազգային անվտանգության խնդիր է դառնում Լիբանանում փեյջերի պայթյունների ֆոնին. սմարթֆոնները, կենցաղային տեխնիկան և մեքենաները ապագայում կարող են վերածվել «զանգվածային զենքի», գրում է թուրքական Sabah թերթը։
«Դասն այն է, որ այս բարբարոսությունը դուրս է գալիս «Հեզբոլլահի» սահմաններից և կարող է ապագայում սպառնալիք դառնալ: Մասնավորապես, ռիսկը, որ տեխնոլոգիական արտադրանքները, ինչպիսիք են սմարթֆոնները, մեքենաները, կենցաղային տեխնիկան և համակարգիչները, նույնպես կարող են վերածվել զանգվածային զենքի: Այս առումով բարձր տեխնոլոգիաների ոլորտում անկախ ծրագրային ապահովումն ու սարքավորումն այսօր Թուրքիայի համար ազգային անվտանգության խնդիր է դառնում, ուստի մեր գոյատևումը կախված կլինի ճիշտ դասեր քաղելուց»,- գրում է Sabah թերթը։