Այս աղջիկը պետք է հոտնկայս, պատկառանքով լսեր Հրայր Թովմասյանին
Հրայր Թովմասյանի դեմ Նիկոլ Փաշինյանի անհուն ատելությունը ամենաարտառոց դրսեւորումները ստացավ այս տարիներին: Էլ հատուկ հանրաքվե ձեռնարկել, որի ժամանակ քովիդն այնպիսի չափերի հասավ, որ ստիպված էին Հանրաքվեի սկսված գործընթացը դադարեցնել եւ կարանտին հայտարարել: Էլ ինչ որ առեղծվածային «կաշառքի» պատմությունը, որ գրիչի տեսքով մատուցվել է Փաշինյանին, որ Հրայրին «լավ աչքով» նայի: Էլ հատուկ օրենքի ընդունում, որ բարձր կենսաթոշակով գայթակղեն գործող ՍԴ դատավորներին եւ նրանք հրաժարականներ տան: Էլ Սահմանադրության փոփոխություն` ապօրինի ճանապարհով, որ ազատվի Թովմասյանի թիմից եւ ՍԴ-ն լցնի իր կամակատարներով:
Բայց անգամ ՍԴ-ն մաքրելուց հետո, երբ այնտեղ միայն մեկ «նախկին» դատավոր է մնացել` ի դեմս Հրայր Թովմասյանի, չբավարարեց Փաշինյանին եւ նրա հանձնարարությամբ նաեւ քրեական գործ կարվեց վերջինիս վրա: Երկիրը մաս մաս հանձնած, կոռուպցիայի մեջ թաղված, պետական բյուջեն որպես սեփական հորից ստացած ժառանգություն օգտագործող իշխանությունը մի սեփականաշնորհված տարածքի պատմություն է մեջտեղ բերել ու ՍԴ նախկին նախագահ է դատում:
Դա էլ դեռ ոչինչ, բայց դատավարության ընթացքին հետեւելիս ուղղակի զարհուրում ես, թե ինչքան ցինիկ, ինչքան ապօրինի կարող է լինել դատավարությունը, մարդու իրավունքների, արժանապատվության, տարրական էթիկայի ինչքան խախտումներ կարող են արձանագրվել մի գործընթացի ժամանակ:
Նախ, վստահ եմ, հատուկ են գործը մակագրել ամենաերիտասարդ դատավորներից մեկին` ոչ պետական բուհ ավարտած, հոնքերը տատու արած, շրթունքները լցրած, ֆոտոմոդելի տեսքով այդ կնոջը` Տաթեւիկ Գրիգորյանին: Սա էլ է չէ՞ իրավաբանական գիտությունների դոկտորին, հայտնի սահմանադրագետին, մեր ամենագրագետ իրավաբաններից մեկին ստորացնելու մի եղանակ: Մանավանդ այս աղջիկն ուղղակի պետք է պատկառանքով լռեր ու լսեր Հրայր Թովմասյանին` երբ նա խոսում է եւ փորձեր ինչ որ բան սովորել նրանից, իսկ հիմա դասեր է տալիս, դիտողություններ անում, սաստում եւ սանկցիաներ կիրառում նրա նկատմամբ: Չկայացած եւ փոքր մարդու պահվածք:
Ես մշտապես չեմ հետեւել նիստերին, վստահ եմ, որ զարհուրելի բաներ եղած կլինեն, ընդամենը մի քանի կտոր եմ դիտել եւ ապշել, թե ինչպես է կիսագրագետ ու մեծամիտ զանգվածը բույն դրել ամենուրեք, դարձել թելադրող, իր ապօրինություններն անելիս` ինքնավստահ, որովհետեւ թիկունքում նույնքան տգետ ու չար իշխանություն ունի, որը իր թիրախներից մեկին վաղուց է որոշել եւ հանձնել իրավապահներին` հոշոտման:
Ասենք, այս երիտասարդ ու անփորձ դատավորը պարբերաբար դատարանի դահլիճից հեռացնում է մեղադրյալին` Հրայր Թովմասյանին, որովհետեւ նա փորձում է իր իրավունքները պաշտպանել: Կամ հայտարարում է, որ պատմության մեջ նման դեպք չի եղել, որ 27 ժամ պաշտպանական ճառ արտասանեն, իսկ պաշտպանական ճառը մեղադրյալի սուրբ իրավունքն է եւ եթե նա հարկ է համարում 27 շաբաթ խոսել` օրենքը դա որեւէ կերպ չի սահմանափակում եւ չի արգելում:
Պարզ է, որ զուգված-զարդարված այս տիկինը հրահանգ է ստացել` շտապել: Արագ դատավճիռ կայացնել, քանի որ վաղեմության ժամկետ կա: Խաղաղության պայմանագիր կա, որը պետք է հաստատվի ՍԴ-ում, իսկ Փաշինյանը «կռով իզ նոս» ուզում է ազատվել Հրայրից: Մի քանի լիազորությունները դադարեցված դատավորների օրինակներ կան, որոնց Կարեն Անդրեասյանը հեռացրեց համակարգից եւ Տաթեւիկն, ակնհայտորեն, չի ուզում նրանց ճակատագրին արժանանալ: Մի խոսքով` պետք է շտապել:
Բայց, նախ, թքած այդ պաշտոնի վրա, որ այդքան ստորությունների գնով պետք է պահպանվի: Երկրորդը` իսկ որտեղ են միջազգային կառույցներն ու իրավապաշտպանները, ՀԿ-ներն ու քաղհասարակությունը, իրավաբանական հանրությունը, որոնք չեն հետեւում այս դատին, հայտարարություններ չեն անում, չեն փորձում կանխել քաղաքական պատվերի կատարումը:
Ի վերջո, սա Հրայր Թովմասյանի հարցը չէ, այլ այն լկտիությունն ու անամոթությունը, որով կատարվում են իշխանությունից իջած հրահանգները: Այսօր Հրայրն է, վաղը կարող է լինել ձեզնից յուրաքանչյուրը:
Արեգ Մարգարյան