Հայաստանը չի հրաժարվել Հռոմի ստատուտի իր ստորագրությունից, սակայն հրաժարվել է ԵԽ նախարարների կոմիտեի հայտարարության ստորագրումից
2024 թվականի սեպտեմբերի 5-ին Վիլնյուսում կայացել է Եվրոպայի խորհրդի անդամ պետությունների արդարադատության նախարարների խորհրդի նիստ, որտեղ ընդունվել է հայտարարություն՝ Ուկրաինայում կատարված հանցագործությունների համար միջազգային պատասխանատվության ապահովման մասին։ Այդ մասին «Փաստինֆո»-ին տեղեկացրեց ՀՅԴ Հայ դատի կենտրոնական գրասենյակի հատուկ ծրագրերի պատասխանատու Գևորգ Ղուկասյանը:
Նրա փոխանցմամբ՝ ընդունված համապատասխան հայտարարությամբ վերահաստատվում է Միջազգային քրեական դատարանի որոշումը՝ մի շարք ռուս բարձրաստիճան պաշտոնյաների, այդ թվում նախագահի, արտգործնախարարի, պաշտպանության նախկին նախարարի, գլխավոր շտաբի պետի և այլոց ձերբակալության մասին և ընդհանրապես բանաձևը վերաբերում է Ուկրաինայում ՌԴ կողմից իրականցվող գործողություններին:
Հայտարարության նախնական տեքստի մեջ, իբրև ստորագրող պետություն, եղել է նաև Հայաստանի անունը՝ ի թիվս շուրջ 40 պետությունների, բայց բանաձևի ընդունումից առաջ ՀՀ-ն, ըստ ամենայնի, հետ է կանչել իր ստորագրությունը, քանի որ այն չկա վերջնական տեքստում։
Կարող եմ հստակ նշել, որ կատարվածը չի վերաբերում Միջազգային քրեական դատարանի Հռոմի կանոնադրությունից ՀՀ-ի ստորագրության հետ կանչին: «Սա ընդամենը Եվրոպայի Խորհրդի արդարադատության նախարարների խորհրդի կողմից ընդունված հայտարարություն է, որը իրավակիրառ ուժ չունի, սա ուղղակի ներքոստորագրյալ պետությունների քաղաքական կամքի բյուրեղացումն է՝ այս խնդրով: ՀՀ ստորագրությունը շարունակում է մնալ Միջազգային քրեական դատարանի կանոնադրության տակ, սա չի կարող պատճառ դառնալ, որ համարվի կամ մեկնաբանվի այնպես, որ Հայաստանը Հռոմի ստատուտից իր ստորագրությունը հետ է կանչել»,- ասաց Ղուկասյանը: