Իմ որդիները ջերմոց կամ այգի են կառուցում, պտի չկառուցե՞ն.ՊԵԿ նախագահ

Արդյոք շահերի բախում չկա նրանում, որ իր որդիների հետ փոխկապակցված ընկերությանը հարկային արտոնություններ են տրվում,լրագրողները հարցրեցին Պետական եկամուտների կոմիտեի նախագահ Վարդան Հարությունյանին,ինչից նա վրդովվեց : «Բոլորին արտոնություն տրվում է: Բոլոր նրանք, ովքեր էդ մասով ներդրումներ են անում, այսինքն՝ գյուղատնտեսության ոլորտում, ստանում են: Մեքենա-սարքավորումների ներմուծումը հունվարի 1-ից ազատվում է, և այդ արտոնությունը տրվել է այն կոնտեքստում, որ ամսի մեկից նորից այդ գանձած գումարների հետ վերադարձի խնդիր չառաջանա:Չկա ընկերություն, որը դիմած լինի և այդ արտոնությունից ստացած չլինի»,- նշեց նա: Թե իսկ ինչպե՞ս է ստացվում, որ հարկային արտոնություններ ստացող ընկերությունների 30 տոկոսը փոխկապակցված են պաշտոնյաների հետ, ՊԵԿ նախագահը պատասխանեց՝ իսկ ո՞վ ասաց, որ պաշտոնյաների ազգականներն իրավունք չունեն արտոնությունից օգտվելու, սահամանափակում կա՞.«Ես բարձրաձայն հնչեցնում եմ, որ բոլորին է թույլատրվում, բոլոր էն տնտեսվարողները, ովքեր դիմում են, ստանում են էդ արտոնությունը, ավելին, հունվարի 1-ից դա բոլորի համար է գործելու»: Կառավարությունը մի կողմից հայտարարում է, որ պայքարում է շահերի բախման դեմ, օրենքներ է ընդունում այդ ուղղությամբ, բայց մյուս կողմից նմանօրինակ արտոնություններ են տրվում պաշտոնյաների հետ փոխկապակցված անձանց, դա նորմա՞լ է, հարցին ի պատասխան Վարդան Հարությունյանը նշեց. «Իմ որդիները ջերմոց կամ այգի են կառուցում, պտի չկառուցե՞ն: Էս երկրում ապրելու իրավունք չունե՞ն»: Երբ լրագրողները նկատեցին, որ արտոնյալները ջերմոց են կառուցում, իսկ հասարակ գյուղացին այդ հնարավորությունը չունի, ՊԵԿ նախագահն ասաց.Թող գյուղացիներն էլ նույնն անեն, ոչ մի արգելք չկա: