Ով և ինչպես է ճնշում տնտեսվարողին

«Մենք խնդիր ունենք տնտեսվարողների շահերը պաշտպանելու :Հարկային տեսուչները, ստուգելով տնտեսվարողին, գրում են համապատասխան ստուգման ակտ։ Տնտեսվարողը դիմում է դատարան, բայց հարկային ծառայությունը, չսպասելով արդյունքներին, քննչական կոմիտեին է դիմում և լրացուցիչ ճնշում է գործադրում տնտեսվարողի նկատմամբ։ Տնտեսվարողին 27 կողմից ճնշման են ենթարկում», -  ԱԺ-ում 2018 թվականի բյուջեի նախնական տարբերակի քննարկման ժամանակ ՊԵԿ փոխնախագահին հարց ուղղելիս իր մտահոգությունը հայտնեց «Ծառուկյան» խմբակցության պատգամավոր Սերգեյ Բագրատյանը։ Եթե 2018-ին նախատեսվում է 0,2 տոկոսային կետով ավելացնել ներդրումները, ապա չպետք է ներդրողների վրա ևս ճնշումներ գործադրել,ասաց նա: «Տնտեսվարող սուբյեկտները ճնշումների չեն ենթարկվում։ Ձեր կողմից ներկայացված բառերով չէի բնութագրի մեր կողմից իրականացված վարչարարությունը։ Եթե խախտումը գերազանցում է 4 մլն դրամը, ապա հարուցվում է քրեական վարույթ, բայց դա չի չի նշանակում, որ քրեական վարույթը շարունակվում է, որովհետև քանի դեռ ակտը անբողոքարկելի չի դարձել, գործը կասեցված է մնում, մինչև համապատասխան որոշում կայացվելը։ Թե ինչ ճնումների մասին եք խոսում, ինձ համար անհասկանալի է», - նշեց Վախթանգ Միրումյանը: Պատգամավորը չհամաձայնեց ՊԵԿ փոխնախագահի դիտարկման հետ՝ նշելով, որ բազմաթիվ տնտեսվարողներ հենց այսօր էլ բողոքում են, որ ստուգման ակտում միտումնավորություն կա 4 մլնից ավելի գրելու. «Սա արվում է, որ քննչական մարմիններին ներգրավեք, որպեսզի տնտեսվարողը ընդունի ակտերը։ Առաջարկում եք ձեր ասած ձևով դատական պրոցեսն ավարտել»։