3-ամյա երեխային պատանդ վերցրած տղամարդը խմիչքի ազդեցության տակ է եղել. նա ձերբակալված է.ՀԺ

Երեկ Արմավիրի մարզի «Մանուշակ» մանկապարտեզում 3-ամյա երեխային պատանդ վերցրած 36-ամյա Արգամ Հովիկյանը դեռեւս գտնվում է Հոկտեմբերյանի շրջանային կնետրոնական հիվանդանոցում: Ինչպես արդեն տեղեկացրել ենք, Արգամ Հովիկյանը երեկ շուրջ 4 ժամ պատանդ էր պահել «Մանուշակ» մանկապարտեզի սաներից մեկին՝ 3-ամյա Հմայակին: Նա պահանջում էր նախկին կնոջը: Հայկական ժամանակի հետ զրույցում ՀՀ քննչական կոմիտեի նախագահի խորհդրական Սոնա Տռուզյանն ասաց, որ տղամարդն ունի ձերբակալվածի կարգավիճակ: Նա դեռ չի հարցաքննվել: Հիշեցնենք, որ Արգամ Հովիկյանը երեկ ինքնավնասում է կատարել. նա վնասվածքներ է ստացել կրծքավանդակի հատվածում եւ վիրահատվել: Պատանդառուի նախկին կինը՝ Լ. Հովհաննիսյանը նույնպես հիվանդանոցում է. նա երեկ երեկոյան տեղափոխվել է թիվ 1 հիվանդանոցային համալիր: Հիվանդանոցի մամուլի ծառայությունից մեզ հայտնեցին, որ համալսարանական հիվանդանոց տեղափոխված 23-ամյա կնոջը երեկ ժամը 23.00-ի սահմաններում կատարվել է միկրովիրաբուժական վիրահատություն՝ աջ դաստակի ամբողջականությունը վերականգնելու նպատակով: «Նշենք նաեւ, որ հիվանդի մոտ կրծքավանդակի 5-րդ, 6-րդ կողերի արանքում առկա էր վերք: Կատարվել է համակարգչային տոմոգրաֆիա, վերքի առաջնային մշակում: Եվս մեկ վնասվածք՝ ծնոտի տակը կտրված վերքը նույնպես մշակվել է: Այժմ հիվանդը գտնվում է վիրաբուժական բաժանմունքում: Բժիշկները նրա վիճակը գնահատում են բավարար»,- ասացին մամուլի  ծառայությունից: Մեր տեղեկություններով, երեկ պատանդառուն խմիչքի ազդեցության տակ է եղել, մանկապարտեզ մտնելուն պես նա դանակով հարձակվել է նախկին կնոջ տատու՝ մանակապարտեզի վարիչ Ռոզա Վարդանյանի վրա, իսկ երբ նախկին կինն է հասել, նրան նույնպես վնասվածքներ է պատճառել. կնոջը հաջողվել է դիմել փախուստի, ինչից հետո Արգամ Հովիկյանը կողքի սենյակում գտնվող 3-ամյա Հմայակին պատանդ է վերցրել: Ի սկզբանե պատանդ է վերցվել մեկ երեխա: «Մանուշակ» մանկապարտեզի վարիչը թեթեւ վնասվածքներ է ստացել պարանոցի հատվածում: 36-ամյա պանտադառուի ֆեսյբուքյան էջի ուսումնասիրությունից պարզեցինք, որ դեպքից օրեր առաջ իր ֆեյսբուքյան էջում հրապարկել է նախկին կնոջ հետ ունեցած նամակագրությունը: Դրանից պարզ դարձավ, որ տղամարդը կնոջ հետ նորմալ հարաբերություններ է ունեցել անգամ բաժանվելուց հետո, իսկ բաժանության համար մեղադրել է կնոջ տատուն, ինչպես նաեւ աներոջը: Նամակագրությունները տարածելիս Արգամ Հովիկյանը նաեւ հետեւյալ մեկնաբանությունն է գրել. «Սա նրա համար, որ արդեն հավասարվում եմ ձեզ, ցավոք, էս էլ սիրելի զոքանչիս պատկերը»: Նշենք, որ դեպքի առթիվ հարուցվել է քրեական գործ՝ ՀՀ քրեական օրենսգքրի  218-րդ հոդվածի 2-րդ մասի 3-րդ եւ 4-րդ կետերով (պատանդ վերցնելը, որը կատարվել է զենքի գործադրմամբ՝ ակնհայտ անչափահասի նկատմամբ):