Ով է հրահրում «Մալաթիա» տոնավաճառի առեւտրականներին

«Մալաթիա» տոնավաճառի աշխատակիցները կրկին բողոքի ակցիաներ են նախաձեռնել, առավոտից նրանք փակել են Անդրանիկի փողոցն ու պահանջում են իջեցնել վարձավճարները: Խոսակցություններ կան, որ հայտնի գործարար Սամվել Ալեքսանյանի մարդիկ են հրահրում բողոքի ակցիաները, ուզում են այնպես անել, որ առևտրականները տոնավաճառից տեղափոխվեն Ալեքսանյանին պատկանող նորաբաց «Մալաթիա մոլ» առևտրի կենտրոն: Տոնավաճառի տնօրենը Սամվել Ավետիսյանն է, ԱԺ նախկին պատգամավոր: Այժմ վարձավճարը 160 հազար դրամ է, առեւտրականները պահանջում են, որպեսզի այն նվազի մինչև 80 հազար դրամ։ Այն, որ առեւտրականների պահանջը միանգամայն տեղի է, երկու կարծիք չկա, նախ նկատի ունենալով սոցիալ-տնտեսական վիճակը եւ ժողովրդի կենսապայմանները, վստահաբար կարելի է պնդել, որ առեւտուրը հագուստի առեւտուրը ոչ թե քչացել, այլ գրեթե <<կանգնել>> է, առնվազն 50 տոկոսն այսօր մեծ դժվարությամբ հանապազօրյա հացի խնդիր են լուծում, էլ ուր մնաց հագուստի մասին մտածի: Դրանից բացի, այս տոնավաճառում երեւելի պայմաններ ստեղծված չեն նման գներ հասմանելու համար: Ու առեւտրականներից մեկը դիպուկ էր գտնվել, ասելով. «Գոմը սարքել են սուպերմարկետ, դեռ մի բան էլ աստղաբաշխական գումարներ են ուզում»: Այս տոնավաճառի առևտրականները պարբերաբար նման ակցիաներով են հանդես եկել, բայց դրանք որպես կանոն ժամերի ընթացքում դադարեցվել են, երբ տնօրենը խոստացել է անգամ չնչին գումարով իջեցնել վարձավճարները:Սակայն այս անգամ կարծես վճռական են տրամադրված, նրանք անգամ փակել էին տոնավաճառի դիմաց գտնվող երթևեկելի հատվածը, ոստիկանությունը երթևեկելի հատվածը բացել էր, որի ընթացքում բերման է ենթարկվել տոնավաճառի երկու աշխատակից, ինչը հավաքվածների զայրույթն ավելի է բորբոքել: Իրավիճակն այն աստիճան է սրվել, որ տոնավաճառի տնօրեն Սամվել Մարտիրոսյանն է բանակցել ու համաձայնել իջեցնել վարձավճարները 20 հազար դրամով։ Բայց մի պայմանով` այլևս ոչ մեկի փոխարեն հաշվապահություն չի անելու։Առևտրականների այն հարցին, թե ինչպե՞ս են իրենք վարվելու, երբ հարկայինից գան ու պահանջեն իրենց համար ցանկալի թիվ ցույց տալ, Մարտիրոսյանը պատասխանել է, որ դա իր խնդիրը չէ։ «Ես պարբերաբար իջեցրել եմ վարձավճարները, պատրաստ էի նույնն անել նաև գարնան սկզբին։ Բայց դու ինձ պատասխանեցիք փողոց փակելով։ Շատ շնորհակալ եմ ձեզանից, բայց ուզում եմ իմանալ` ո՞վ ձեզ դրդեց փողոց փակել»,- հարցրել էր «Մալաթիա» տոնավաճառի տնօրենը՝ ըստ էության ակնարկելով, որ այս անգամ էլ է ակցիան հրահրված։ Աշխատակիցների եւ տնօրենի բանակցությունները շարունակվել է նաեւ առանձին՝ վերջինի աշխատասենյակում, սակայն համաձայնություն չի կայացել։ Վաղն առավոտից նրանք կրկին բողոքի ակցիա կանցկացնեն տոնավաճառի հարակից տարածքում։ Ի դեպ, հատկանշական է, որ <<Հրազդան>> տոնավաճառի սեփականատեր Աշոտ Աղաբաբյանը նույնպես փորձել է օգտվել ստեղծված իրավիճակից ու հայտարարել, որ ինքը պատրաստ է 50 հազար դրամ տեղավճարով ընդունել Մալաթիայի աշխատակիցներին: Ընդամենը մեկ տարի առաջ Աղաբաբյանը գրեթե նույն տարբերակով սննկացավ, քանի որ Հրազդանի առեւտրականներն բարձր գների պատճառով <<արտագաղթեցին>> Ծառուկյանի Առինջ մոլ, պատգամավորը թերեւս հետեւություններ է արել ու կողմ է առողջ մրցակցությանը: Անի Սահակյան