«Շումախերական» վթար Երևանում

Այսօր` փետրվարի 28-ին, խոշոր ավտովթար է տեղի ունեցել Երևանում: Ժամը 10:00-ի սահմաններում Դավիթաշեն վարչական շրջանում` Մելքումովի փողոցում, բախվել են BMW մակնիշի 98 PN 008 համարանիշի և Opel մակնիշի 83 AA 808 համարանիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, ըստ նախնական տեղեկությունների` վթարի հետևանքով, բարեբախտաբար, զոհեր և վիրավորներ չկան: Վթարի հետևանքով BMW-ն դուրս է եկել ճանապարհի երթևեկելի գոտուց, հարվածել ապառաժ քարերին, հետո հարվածել ծառին և կողաշրջվելով` հայտնվել 69-ամյա Արշալույս Էլոյանի հողամասում: Ֆոտոլրագրողի հետ զրույցում Ա. էլոյանը ասում էր. «Եթե պոպոքի ծառը չլիներ` մեքենան ընկնում էր իմ վրա: BMW –ի ընթացքը կանխվել է ծառի շնորհիվ»: Օպերատվորեն դեպքի վայր են Արտակարգ իրավիճակների նախարարության փրկարար ծառայության թիվ 15 հրշեջ-փրկարարական ջոկատը` հրամանատար Արթուր Սիմոնյանի գլխավորությամբ, Ճգնաժամային կառավարման ազգային կենտրոնի օպերատիվ խումբը` փրկարար ծառայության կապիտան Կարինե Հարությունյանի գլխավորությամբ: Փրկարարները հոսանքազրկել են ավտոմեքենան և փակել գազաբալոնը: Վթարի վայր են ժամանել ճանապարհային ոստիկանության 1-ին դասակի աշխատակիցները` ավագ տեսուչ Մինաս Մինասյանի գլխավորությամբ: Մինչ փրկարարների և ճանապարհային ոստիկանների ժամանումը` BMW–ի վարորդը ինքնուրույն դուրս է եկել ավտմեքենայից և դեպքի վայր ժամանած շտապօգնության բժիշկներին հայտնել է, որ հրաժարվում է բժիշկների օգնությունից, քանի որ վթարի հետանքով վնասվածքներ չի ստացել: Տեղում աշխատում են նաև Դավիթաշեն վարչական շրջանի կոմունալ ծառայոթյան աշխատակիցները` բաժնի պետի գլխավորությամբ: Վթարի մասին ՃՈ օպերատիվ կառավարման կենտրոնից տեղեկությունը փոխանցել են ՃՈ հետաքննչական բաժին, որեղից ժամանել է ավագ հետաքննիչ Անդրանիկ Իսախանյանը, ում կողմից փաստի առթիվ նյութեր են նախապատրաստվում: Վթարի վայրի հարևանությամբ բնակվողները արդարացիորեն բարձրաձայնում էին. «Նշված հատվածը երբ քարուքանդ էր` վթարներ չեին լինում, ուրախացանք, որ քաղաքի իշխանությունն ու Դավիթաշենի թաղապետարանը մարդաբոյ փոսրը վերացրեցին ու ողջ ճանապարհը ասֆալտապատեցին: Ցավոք, լավ գործը կիսատ թողեցին, ոչ գծանշում կա, ոչ երթևկության նշաններ են տեղադրվել: Դրա համար էլ օրը մեջ վթարների պակաս չկա: Ճիշտ կանեն, արագաչափ տեղադրեն, ինչից հետո վստահ ենք, որ կարոտ կմնանք վթարներին»: