«Ես հանցագործ չեմ». Սամվել Բաբայանը ցուցմունք է տալիս

«Իգլա»-ի  գործով հերթական դատական նիստին  ԼՂՀ պաշտպանության նախկին նախարար Սամվել Բաբայանը պատմեց,որ  2016թ. մարտին գործով մյուս ամբաստանյալ, ազատամարտիկ Սանասար Գաբրիելյանն իրեն պլաշետով ցույց է տվել «Իգլա»-ի լուսանկարներ ու հարցուփորձ արել, ինքն էլ բացատրել է, որ բացակայող մասնիկ կա, առանց որի «Իգլա» համալիրը չի կարող աշխատել:Այնուհետև  Սանասար Գաբրիելյանը հարցրել է՝ «կարո՞ղ է այն բանակին պետք գալ», Բաբայանն էլ, ինչպես ինքը նշեց, ասել է, որ «այո», եթե համապատասխան կերպով փաթեթավորվի եւ հողում թաղվի: «Խնդիրն այն էր, որ Գաբրիելյանի վրա քրեական գործ կհարուցեին, եթե «Իգլան» ձեռքին բռնվեր, ուստի թող այնպես անի, որ ստացվի՝ ռազմամթերք է հայտնաբերվել: Այդ դեպքում զինատեսակը կարելի էր հանձնել եւ չենթարկվել քրեական պատասխանատվության: Սանասար Գաբրիելյանից չեմ  հետաքրքրվել, թե որտեղից այդ «Իգլան», իսկ երբ Գաբրիելյանը ձերբակալվել է, վերջինիս ընկերոջը հրահանգել է պլանշետից ջնջել զենքի լուսանկարները:Ես դրդել եմ չիրականացնել Իգլա»-ի գործարքը, ոչ թե կատարել այն: Չեմ գտնում, որ այդ «Իգլան» Վրաստանից է, ես դա կապացուցեմ՝ որտեղի՞ց է եւ ո՞ւմ գարաժից»,-պատմեց Բաբայանը: Մեղադրող-դատախազ Արամ Արամյաներին պատասխանելով էլ ասաց,որ  Սանասար Գաբրիելյանը պետք է Վրաստանից տախտակներ բերեր , դա է միայն եղել: Ինչո՞ւ հենց ձեզ է ցույց տվել «Իգլա»-ի լուսանկարները հարցին էլ պատասխանեց,որ իր  մտերիմն է, որին գիտի  1992թ-ից, նա ծառայել է :« Էլ ո՞ւմ ցույց տար, եթե ոչ ինձ: Եթե ձեր մոտ բերեր, կիմանայի՞ք ինչ է: Ես, լավ հասկանալով, որ դա ռազմամթերք է, որի պատճառով նրա դեմ կարող էր գործ հարուցվեր, նման խորհուրդ եմ տվել»: Սանասար Գաբրիելյանն իր ցուցմունքում նշել է, որ «Իգլան» պետք է բանակին նվիրեր: Ի՞նչ է ձեզ հայտնի այդ մասին,հարցեց դատախազը,ինչին էլ ի պատասխան Բաբայանն ասաց,որ տեղյակ չի եղել: Սանասարը բացատրություններ չի տվել:  Սամվել Բաբայանի խոսքով՝ ինքը հանցագործ չէ, ոչ մեկի չի դրդել «Իգլա» ձեռքբերելուն, նման փաստ չկա:   Հիշեցնենք՝ անցած դատական նիստին առանցքային մեղադրյալներից Բաբայանի մարտական ընկեր Սանասար Գաբրիելյանը, ով մինչև այդ պնդում էր, թե գործը շինծու է, ինքը որևէ առնչություն չունի առաջադրված մեղադրանքի հետ, հայտարարեց, թե ինքն է ցանկացել ձեռք բերել «Իգլա» զինատեսակը՝ բանակին նվիրելու նպատակով: Նշենք, որ ըստ մեղադրանքի, Բաբայանն է դրդել Գաբրիելյանին ու մյուսներին ձեռք բերել «Իգլա» զինատեսակը: Թե ինչ նպատակով՝ մեղադրականում չի հստակեցվում: Սամվել Բաբայանը ձերբակալվել է այս տարվա մարտի 22-ին՝ Հայաստանի խորհրդարանական ընտրություններից օրեր առաջ: Նա «Օհանյան-Րաֆֆի-Օսկանյան» դաշինքի համակիրն էր։ Բաբայանը մեղադրվում է «Իգլա» տեսակի զենիթահրթիռային համալիր ձեռք բերելու, ինչպես նաև փողերի լվացման մեջ: Մասնավորապես, ըստ մեղադրանքի, նա փորձել է հանցավոր ճանապարհով Ռուսաստանից ստացված՝ օրինական շրջնառությունից դուրս եկած և հատուկ ներկանյութով ներկված եվրո թղթադրամները քիմիական մաքրման ենթարկել՝ հետագայում դրանք Հայաստանում շրջանառության մեջ դնելու նպատակով: Բաբայանն ինչպես այս, այնպես էլ «Իգլա» ձեռք բերելու հետ կապված մեղադրանքները չի ընդունում: