Խնձոր նետելը խուլիգանություն է, լոլիկը՝ ոչ

Երեւանի տարեց բնակչի կողմից 9-րդ հարկից Նիկոլ Փաշինյանի ուղղությամբ խնձոր նետելը ՀՀ ՔԿ-ն խուլիգանություն է որակել։ «Փաստինֆո»-ի հարցին ի պատասխան ՀՀ ՔԿ-ից հայտնել են, որ դեպքի առթիվ վարույթ է նախաձեռնվել ՀՀ քրեական օրենսգրքի 279-րդ հոդվածի 1-ին մասով եւ մեկ անձ ձերբակալվել է։

Մամուլն ավելի վաղ գրել էր, որ արտառոց դեպքը գրանցվել է Քանաքեռ -Զեյթուն վարչական շրջանում։ Ըստ ArmLur.am-ի՝ 9-րդ հարկի բնակիչ 71-ամյա Ալբերտ Առստամյանն, տեսնելով Փաշինյանին, տանից վերցրել է խնձորն ու նետել նրա ուղղությամբ։

Նկատենք, որ խուլիգանություն հանցակազմը ենթադրում է՝ «հասարակության նկատմամբ անհարգալից կամ իրավական կամ բարոյական նորմերի նկատմամբ բացահայտ արհամարհական վերաբերմունք ցուցաբերելը, որը դրսևորվել է անձին ստորացնելով կամ հայհոյանքներով կամ անպարկեշտ արտահայտություններով կամ համակեցության կանոնների ցուցադրաբար անտեսմամբ մարդկանց անդորրը խախտելով կամ նույն եղանակներով հանրային միջոցառումը, արարողությունը խափանելով կամ հասարակական նշանակության օբյեկտի, հիմնարկի կամ կազմակերպության բնականոն աշխատանքը խոչընդոտելով»։ Համենայն դեպս՝ քրօրենսգրքում այսպես է սահմանվել հանցակազմը, թերեւս խնձոր նետելը իրավապահները գնահատել են անձին ստորացնել ու հայհոյել՝ միայն իրենց բնորոշ ընկալման շրջանակներում։ Ավելին, այս հոդվածը նախատեսում է նաեւ տուգանք, սակայն քննչական մարմինները նախընտրել են ձերբակալել տարեց տղամարդուն։

Հաշվի առնելով, որ ՔԿ-ն տվյալ պարագայում գործել է խիստ ակտիվ ու խնձոր նետելը համարում է հանցագործություն՝ «Փաստինֆո»-ն հետաքրքրվեց, թե արդյոք վարույթ նախաձեռնվել է նաեւ նախօրեին Նիկոլ Փաշինյանին կից արտախորհրդարանական ուժերի ներկայացուցիչների կողմից՝ Արման Բաբաջանյանի գլխավորությամբ, Երեւանում Բելոռուսի դեսպանատան ուղղությամբ լոլիկ ու ձու նետելու ուղղությամբ։ Սակայն այս դեպքում պարզվեց, որ վարույթ չկա։ ՔԿ-ից հայտնել են, թե հաղորդում չեն ստացել։

Այստեղից կարելի է մի քանի հետեւություն անել, այն է՝ Նիկոլ Փաշինյանը շտապել է քաղաքացու դեմ հաղորդում ներկայացնել։ Երկրորդ՝ քրդատօրենսգրքի պահանջը եւս չի կատարվում եւ մամուլի հրապարակումներն այլեւս առթիվ չեն համարվում, քանի որ ՀՀ քրդատօրենսգրքի 173-րդ հոդվածի 4-րդ մասն ուղղակի սահմանում է, որ ԶԼՄ-ներում առերևույթ հանցանքի մասին հրապարակված տեղեկությունները քննիչի համար կարող են քրեական վարույթ նախաձեռնելու առիթ լինել ու եթե խնձոր նետելը հանցանք է համարվում, ապա թվում է, որ հանցանք է նաեւ լոլիկ նետելը, հետեւեապես արդեն երկու օր է, ինչ մամուլը, նաեւ իշխանական, հեղեղված է հանցանքի մասին տեղեկությամբ, բայց քննչականը անգործության է մատնվել։ Կամ էլ՝ լոլիկ նետելը հանցանք չէ, իսկ խնձորը՝ այո, հետեւապես հաջորդ անգամ քաղաքացիները իրենց քաղաքական դիրքորոշումը կարող են ցուցաբերել լոլիկ նետելով։

Եւ վերջապես երրորդ հետեւությունը՝ հանցանք է այն, ինչ կամենում է քաղաքական իշխանությունը։

Աղբյուր` Փաստինֆո