ԱԱԾ-ն չգիտի ինչպես վարվել. պատժել՝ նախարարությանը, թե Փաշինյանին
![ԱԱԾ-ն չգիտի ինչպես վարվել. պատժել՝ նախարարությանը, թե Փաշինյանին](/timthumb.php?src=/disc/23-08-24/d6ec4b6a51c1995a30230cb95a6b1db5.jpg&w=708)
Կիրանց բնակավայրի բնակիչներին «ոչ ճշգրիտ տվյալների հիման վրա» կադաստրի կոմիտեի կողմից իրավունքի գրանցման վկայականներ տրամադրվելու, այլ խոսքով՝ կեղծ սեփականաշնորհման վկայականներ տալու մասին տեղեկությունները հաստատված չեն առ այս պահը, ՀՀ Արդարադատության նախարարության հայտարարությունները՝ փաստացի հիմնազուրկ։
Հիշեցնենք, որ արդարադատության նախարարությունը, թերեւս փորձելով հիմքեր ստեղծել ոչ միայն հանրային սեփականությունը, այլ նաեւ Կիրանցի բնակիչներին սեփականության իրավունքով պատկանող գույքը փաստացի առգրավելու ու թշնամուն հանձնելու համար, դեռեւս մայիսի 20-ին հայտարարել էր՝ մեջբերում ենք. «Պետք է փաստել, որ համապատասխան իրավունքների պետական գրանցումները կատարվել են ոչ ճշգրիտ տվյալների հիման վրա: Այդ գրանցումները չեն կարող իրավական հիմք հանդիսանալ պնդելու, որ անճշտությունների հիման վրա պետական գրանցումների կատարման փաստի ուժով խնդրո առարկա տարածքները համարվում են ՀՀ ինքնիշխան տարածքի մաս»։
«Փաստինֆո»-ն շուրջ երկու ամիս առաջ՝ հունիսի 7-ին, գրավոր հարցում էր ուղարկել ՀՀ գլխավոր դատախազություն՝ պարզելու, թե արդյո՞ք քրեական վարույթ կա նախաձեռնված՝ Կադաստրի պետական կոմիտեի կողմից կիրանցիներին սեփականաշնորհման կեղծ վկայականներ տրամադրելու վերաբերյալ, եթե այո, ապա՝ երբ է հարուցվել, ինչ հատկանիշներով, քանի նման կեղծ վկայական է տրվել, քանի անձ ունի տուժողի, ինչպես նաև՝ մեղադրյալի կարգավիճակ։ Ակնկալում էինք, որ գուցե նման կեղծ սեփականաշնորհման վկայականներ տալու դեպքեր են բացահայտվել, որ երկրի արդարադատության նախարարությունը պաշտոնապես նման հայտարարությամբ է հանդես եկել, սակայն պարզվել էր, որ նման քրեական վարույթ չկա։
Հունիսի 19-ին «Փաստինֆո»-ի գրավոր հարցմանն ի պատասխան Գլխավոր դատախազությունից հայտնել էին, թե հարցմամբ նշված տեղեկատվությունը փոխանցվել է ՀՀ ազգային անվտանգության ծառայությանը՝ «Օպերատիվ-հետախուզական գործունեության մասին» ՀՀ օրենքով սահմանված կարգով ստուգելու նպատակով։ Ասել է թե՝ առնվազն հայտարարությունն անելու պահին Գրիգոր Մինասյանի ղեկավարած ՀՀ արդարադատության նախարարությունը որևէ հիմք, փաստ չի ունեցել։
Շուրջ երկու ամիս անց «Փաստինֆո»-ն կրկին դիմել է դատախազությանը՝ պարզելու, թե, ի վերջո, ինչ է պարզվել ԱԱԾ-ում, պարզվեց՝ կա՛մ ԱԱԾ-ն առանձնահատուկ ջանասիրություն չեն ցուցաբերում՝ դատախազության հանձնարարականը կատարելու համար, կա՛մ չգիտեն հաղորդումների հետ ինչպես վարվել, քանզի արդարադատության նախարարությունը պաշտոնապես տարածել է կեղծ տեղեկություն, այսինքն՝ թույլ է տվել պաշտոնեական կեղծիք, հետեւապես արձանագրելով, որ ստուգումների արդյունքում Կիրանցի բնակիչներին կեղծ սեփականաշնորհման վկայականներ տալու դեպքեր չեն հայտնաբերվել, ոչ միայն արդարադատության նախարարի պատասխանատվության հարցն է առաջանում, այլ նաեւ Նիկոլ Փաշինյանի՝ ՀՀ սուվերեն տարածքի մաս կազմող՝ Կիրանցի բնակիչներին սեփականության իրավունքով տարածքները Ադրբեջանին նվիրաբերելու համար։
ՀՀ գլխավոր դատախազությունից «Փաստինֆո»-ի գրավոր հարցմանն ի պատասխան հայտնել են, որ ներկայումս քրեական վարույթ նախաձեռնված չէ, ինչպես նաև՝ կրկնել են ավելի վաղ տրված պատասխանը, համաձայն որի՝ ՀՀ գլխավոր դատախազությունում ստացված հաղորդումներն ուղարկվել են ՀՀ ԱԱԾ՝ դրանցում նշված հանգամանքներն «Օպերատիվ-հետախուզական գործունեության մասին» ՀՀ օրենքով սահմանված կարգով ստուգելու նպատակով։
Հեղինակ՝ Իզաբել Սահակյան
Աղբյուր` Փաստինֆո