Կատալոնիայի ղեկավարի գործառույթները կիրականացնի Իսպանիայի փոխվարչապետը

Իսպանիայի վարչապետ Մարիանո Ռախոյը կառավարության փոխնախագահ Սորայե Սաենս դե Սանտամարիային հանձնարարել է ղեկավարել Կատալոնիայի ժեներալիտետը: Այս մասին հայտնում է lavanguardia.com-ը: Ինչպես հաղորդում են իսպանական ԶԼՄ-ները, Թագավորությունը հօգուտ անկախության քվեարկած ինքնավար մարզի նկատմամբ կիրարկել է Սահմանադրության 155-րդ հոդվածը: Համաձայն այդ դրույթի՝ Իսպանիայի կառավարությունը պարտականությունների կատարումից ազատում է ժեներալիտետի նախագահ Կարլես Պուչդեմոնին ու Կատալոնիայի խորհրդականներին և մինչ նոր ընտրությունների անցկացումը այդ պարտականությունները կատարելու համար նշանակում Մադրիդի պաշտոնյաներին: Ավելի վաղ, Կատալոնիայի խորհրդարանն Իսպանիայից անկախանալու վերաբերյալ բանաձեւ էր ընդունել, ինչից հետո Իսպանիայի իշխանությունները կիրառել են Սահմանադրության 155-րդ հոդվածն ու սահմանափակել Կատալոնիայի ինքնավարությունը: Կենտրոնական իշխանությունները նաեւ հայտարարել են Սահմանադրական դատարան դիմելու մասին, որպեսզի չեղարկեն Կատալոնիայի խորհրդարանի ընդունած բանաձեւը: Այս մասին տեղեկացնում է «ՌԻԱ Նովոստին»: