Կասյանն ու Team Telecom Armenia-ն՝ ընդդեմ Ավինյան Տիգրանի․ Կարեն Հեքիմյան

«Քաղաքացու իրավունքների պաշտպան» ՀԿ նախագահ Կարեն Հեքիմյանը Ֆեյսբուքի իր էջում գրում է․ «Կասյանն ու Team Telecom Armenia-ն՝ ընդդեմ Ավինյան Տիգրանի (Tigran Avinyan / Տիգրան Ավինյան):

Տպավորություն է ստեղծվում, որ 1937թ գնդակահարված հայտնի կոմունիստ Կասյան Սարգիսը վերակենդանացել է և Team Telecom Armenia-ի հետ միասին անհաշտ պայքարում է Ավինյան Տիգրանի դեմ: Ուրեմն, Երևանում կար Կասյանի անվան փողոց: Երկար տարիներ և ջանքեր պահանջվեց, որ փողոցն անվանափոխվի: Անվանափոխվեց: Դե յուրե: Իսկ, դե ֆակտո փողոցում մինչ վերջերս դեռ առկա էին Կասյանի անունը կրող ցուցանակներ: Ի վերջո, դրանք էլ հանվեցին: Սակայն, Կասյանին օգնության եկավ Team Telecom Armenia-ն: Վերջինս Կասյանի հոգու հետ «պայմանագիր» կնքեց և ... «Վազգեն 1 Վեհափառի անվան փողոց»-ի բակային հատվածներում Կասյանի անունը կրող «Team»-ական նմուշի ցուցանակներ հայտնվեցին: Այլ կերպ ասած` այժմ Երևանում կա փողոց, որը «փողոցի կողմից» կրում է Վազգեն 1 Վեհափառի, իսկ բակերի կողմից` Կասյան Սարգսի անունը: Սա է Նոր Հայաստանի քաղաքականության համառոտ բնութագիրը: Եվ, ուրեմն` Կեցցե´ Հայաստանի Հանրապետությունը, Կեցցե´ն Վազգեն 1 Վեհափառի - Կասյան Սարգսի փողոցի բնակիչները, Կեցցե´ն մեր երեխաները, որոնք բնակվելու են Մեսրոպ Մաշտոցի - Զախարովա Մարիայի անվան պողոտայում»: