«Նուբարաշեն» ՔԿՀ–ում դատապարտյալն ինքնասպան է եղել

Երեկ՝ հոկտեմբերի 27-ին, ժամը 16։00-ի սահմաններում ՀՀ Արդարադատության նախարարության «Նուբարաշեն» քրեակատարողական հիմնարկի թիվ 008 խցում հագուստի կապիչ թելով մահճակալից կախվելու միջոցով ինքնասպան է եղել 80-ամյա դատապարտյալ Բախշի Երիցյանը։ Այս մասին Tert.am-ի հետ զրույցում ասաց Քրեակատարողական հիմնարկների վարչության մամուլի պատասխանատու Գոռ Ղլեչյանը։ Հարցին,  թե նախկինում դատապարտյալ Բախշի Երիցյանն ինքնասպանության փորձ արել է` Ղլեչյանն պատասխանեց. «Ոչ, բացարձակ։ Ինչ վերաբերում է Ձեր այն հարցին, թե տառապո՞ւմ էր նա արդյոք որևէ հիվանդությամբ, ասեմ, որ այս պահին նրա առողջական պատմությունը ձեռքիս տակ չէ»։ Գոռ Ղլեչյանի խոսքով` ինքնասպան եղած դատապարտյալը նախկինում երբեք ՔԿՀ–ի ղեկավարության հետ խնդիրներ չի ունեցել, որևէ բանից չի բողոքել։ Նշենք, որ Բախշի Երիցյանը դատապարտվել էր ՀՀ քր.օր-ի 104 հոդվածի 1-ին մասի (սպանություն) հատկանիշով։ Բախշի Երիցյանին և Էլմիրա Երիցյանին մեղադրանք է առաջադրվել այն բանի համար, որ նախնական համաձայնությամբ, խմբի կազմում ապօրինաբար դիտավորությամբ կյանքից զրկել են Արշավիր Արմենակի Բարսամյանին: Ռաֆիկ Մկրտչյանին մեղադրանք է առաջադրվել այն բանի համար, որ նա Բախշի և Էլմիրա Մկրտչյաններին մատուցելով տաքսի ծառայություն, կատարված հանցագործության հետքերը թաքցնելու նպատակով` օգնել է վերջիններիս, դիակը տեղափոխել են խոհանոց, սակայն իրենց կամքից անկախ հանգամանքներում հանցագործության հետքերը չեն կարողացել թաքցնել, քանի որ հանցանքի կատարման պահին բռնվել են ոստիկանության աշխատակիցների կողմից ։