Սամցխե-Ջավախքի և Ծալկայի ընդհանուր առաջնորդական փոխանորդը ազատվել է զբաղեցրած պաշտոնից
2017 թվականի հոկտեմբերի 25-ին Սամցխե-Ջավախքի և Ծալկայի ընդհանուր առաջնորդական փոխանորդության Ախալքալաքի գրասենյակում տեղի է ունեցել հոգևոր սպասավորների և պաշտոնեության համատեղ ժողով, որի ժամանակ պարզ է դարձել, որ առաջնորդական փոխանորդ Հոգեշնորհ Տեր Բաբգէն վարդապետ Սալբիյանը ազատվում է զբաղեցրած պաշտոնից: Այս մասին փոխանցում է Վիրահայոց թեմի պաշտոնական կայքը : Ժողովը նախագահել է Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Ժողովի օրակարգում էր երկու հարց. Փոխանորդությունում սպասվող կադրային և կառուցվածքային փոփոխությունները և Սամցխե-Ջավախքում և Ծալկայում ծառայող եկեղեցականների և աշխատակազմի գործունեությունը՝ ըստ այդ փոփոխությունների: «Վազգեն եպիսկոպոսը փոխառաջնորդության հոգևոր դասին և պաշտոնեությանը իրազեկեց, որ այլ ծառայության կոչվելու և փոխառաջնորդարանում սպասվող կառուցվածքային փոփոխությունների բերումով, Սամցխե-Ջավախքի և Ծալկայի ընդհանուր առաջնորդական փոխանորդ Հոգեշնորհ Տեր Բաբգէն վարդապետ Սալբիյանը ազատվում է զբաղեցրած պաշտոնից: Սրբազան Հայրը դրական գնահատեց Բաբգէն վարդապետի տասնվեց տարիների ծառայությունը տեղում և հույս հայտնեց, որ նոր ծառայության վայրում Հոգեշնորհ Հայր Սուրբը Ջավախքում ամբարած փորձով առավել արդյունավետ գործունեություն կծավալի՝ ի շահ Հայոց Եկեղեցու և Մայր Աթոռ Սուրբ Էջմիածնի», – գրում է armenianchurch.ge-ն:
Հետևեք մեզ Viber-ում
