Երևանում խմած և «պռավա» չունեցող վարորդը բախվել է «ԶԻԼ»-ին և գլխիվայր շրջվել․ նրա մոտ հայտնաբերվել է մի քանի փաթեթ թմրամիջոց

Այսօր՝ օգոստոսի 11-ին, խոշոր ավտովթար և դետեկտիվ ժանրի դեպք է տեղի ունեցել Երևանում։ Ժամը 05։40-ի սահմաններում Երևանի բնակիչ 27-ամյա Արտակ Ա․-ն իր վարած «Ford Focus» մակնիշի ավտոմեքենայով ՐաֆՖու փողոցում՝ Սուրբ Երրորդություն եկեղեցու դիմաց, բախվել է ճանապարհի թույլատրելի հատվածում կայանված «ԶԻԼ» մակնիշի գազատար ավտոմեքենային, ապա առաջ ընթացել և գլխիվայր շրջվել։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների, բարեբախտաբար տուժածներ չկան։

Օպերատիվորեն դեպքի վայր են ժամանել ՀՀ Ներքին գործերի նախարարության փրկարար ծառայության Երևանի թիվ 7-րդ հրշեջ-փրկարարական ջոկատից 1 մարտական հաշվարկ։

Հրշեջ-փրկարարները հոսանքազրկել են ավտոմեքենան, փակել գազաբալոնի փականն ու տեղում իրականացրել են հերթապահություն։

Օպերատիվորեն ժամանել են նաև Երևանի շտապօգնության բժիշկների հերթապահ խումբը, սակայն վարորդը հրաժարվել է բժշկական օգնությունից։

Օպերատիվորեն ժամանել են նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկները՝ գնդի հրամանատար Անդրանիկ Իսախանյանի, գումարտակի հրամանատար Գոռ Առաքելյանի, վաշտի հրամանատար Ալյոշա Այվազյանի գլխավորությամբ։

Տարածքը սահմանազատել են նույն վաշտի պարեկներ Արամ Վարդանյանը, Արծրուն Զաքարյանն ու Արտակ Սաֆարյանը։

Երթևեկությունը նշված հատվածում ժամանակավորապես դադարեցվել է։

Վարորդը տեղում ենթարկվել է սթափության փորձաքննության, եղել է ոչ սթափ՝ խմածության ամենաբարձր աստիճանի։

Տեղում պարզվել է նաև, որ նա վարորդական իրավունքի վկայական չունի։

Վթարի փաստով ՊԾ Երևան քաղաքի գնդի 3-դր գումարտակում փաստաթղթեր ձևակերպվեցին, որից հետո պարեկները քաղաքացիների օգնությամբ դարձի բերեցին ավտոմեքենան, ու այդ ժամանակ վարորդը ավտոմեքենայի մեջից ինչ-որ բաներ է հանում և մոտենում է դեպքի վայր ժամանած մի աղջկա՝ հավանաբար գրպանի պարունակությունը նրան փոխանցելու, սակայն պարեկները նկատում են դա և նրա մոտից հայտնաբերում են կասկածելի փաթեթներ, որում առկա է լինում թմրանյութի նմանվող զանգված։

Ֆոտոլրագրողի տեղեկություններով՝ վարորդի հեռախոսի մեջ լինում են նաև տեղեկություններ, թե ինչ պետք է անի նա այդ կասկածելի փաթեթները, որոնք սև և կապույտ կպչուն ժապավենով էին փաթեթավորված։

Տեղում ապօրինի թմրամիջոց պահելու, օգտագործելու կասկածանքով վարորդը պարեկների կողմից բերման է ենթարկվում ոստիկանության Մալաթիայի բաժին, որտեղ նշված դեպքով փաստաթղթեր են ձևակերպվել և փոխանցվելու են ՀՀ Քննչական կոմիտեի Երևան քաղաքի քննչական վարչության Մալաթիայի քննչական բաժին։

Դեպքի վայրում վարորդը, որ հազիվ էր ոտքի վրա կանգնում, անընդհատ ժպտում ու ասում էր․ «100 հատ ավտո եմ շուռ տվել, էս էլ հերթականն ա»։

Պարեկային ծառայությունը պարզում է «ԶԻԼ» մակնիշի ավտոմեքենայի սեփականատիրոջ և վարորդի ինքնությունը։