Դատարանը որոշումը փոխեց

«Հիմադիր խորհրդարանի» առաջնորդ Ժիրայր Սեֆիլյանի ու մյուսների գործով դատական նիստին նախագահող դատավոր Տաթեւիկ Գրիգորյանը բավարարեց գործով ամբաստանյալ Գեւորգ Սաֆարյանի փաստաբան Տիգրան Եգորյանի միջնորդությունը՝ Սաֆարյանին դատական նիստերի դահլիճ վերադարձնելու վերաբերյալ։ Նախորդ նիստերից մեկում Գեւորգ Սաֆարյանի նկատմամբ դատարանը սանկցիա էր կիրառել՝ հեռացնելով դատական նիստերի դահլիճից դատարանի նկատմամբ անհարգալից վերաբերմունք դրսեւորելու համար։ Նախորդ նիստում որոշվել էր Սեֆիլյանի համար հանրային պաշտպան ներգրավել, եւ այսօր դատարան էր ներկայացել Հանրային պաշտպանի գրասենյակի փաստաբան Մարինե Թովմասյանը: Սակայն դատարանը, հաշվի առնելով այն փաստը, որ Սեֆիլյանի պաշտպան Տիգրան Հայրապետյանը եւս ներկայացել է, որոշեց Մարինե Թովմասյանին չներգրավել: Միաժամանակ, նախագահող դատավոր Տաթեւիկ Գրիգորյանը նախազգուշացրեց՝ եթե Տիգրան Հայրապետյանը շարունակի չարաշահել իր իրավունքները, ապա Սեֆիլյանը կզրկվի իր ցանկությամբ պաշտպան ունենալու իրավունքից: