Սխալ տեղեկություն է.Արգամ Աբրահամյանը` Հովիկ Աբրահամյանի և Գագիկ Ծառուկյանի հարաբերությունների մասին

Արգամ Աբրահամյանը հավաստիացնում է, որ իրենց ընտանեկան բիզնեսներին վտանգ չի սպառնում ու չի սպառնացել: Լրագրողների հետ զրույցում Արգամ Աբրահամյանն ասաց, որ իրենց ընտանեկան բիզնեսը երկրից չեն հանում: Հարցին, թե անցե՞լ է այդ վտանգը, նա պատասխանեց. «Վտանգ չի էլ եղել, որ անցնի»: «Իհարկե, ոչ: Դրանք սխալ տեղեկություններ են»,-  հայտարարեց   Արգամ Աբրահամյանը` հերքելով, որ իր հոր՝ Հովիկ Աբրահամյանի և ԲՀԿ առաջնորդ Գագիկ Ծառուկյանի հարաբերությունները լարվել են: Նախկին վարչապետ Տիգրան Սարգսյանի հետ Հովիկ Աբրահամյանի հանդիպման մասին լուրերը Արգամ Աբրահամյանը ո՛չ հերքեց, ո՛չ հաստատեց. «Ես տեղյակ չեմ, բայց հնարավոր է, ի՞նչ կա դրա մեջ»: Խոսելով այն մասին, թե հնարավո՞ր է, որ Հովիկ Աբրահամյանին նորից պաշտոն տան, Արգամ Աբրահամյանն ասաց, որ չգիտի, խնդրեց, որ իրեն նման հարցեր չտրվեն: Ճշտող հարցին՝ կա՞ ինչ-որ խանգարող հանգամանք, որ Հովիկ Աբրահամյանին նորից պաշտոն տան, Արգամ Աբրահամյանը պատասխանեց. «Ոչ»: Թե ինչո՞ւ Ծառուկյան դաշինքն Արտաշատում քաղաքապետի թեկնածու չառաջադրեց՝ հարցին, Ա.Աբարահամյանը պատասխանեց, որ ՀՀԿ ներկայացրած թեկնածուն իրենց համար ընդունելի է, և դա չի նշանակում, որ Աբրահամյանները թուլացնում են իրենց ազդեցությունը Արտաշատում և իշխանությունը հանձնում են ՀՀԿ-ին.«Ի՞նչ իշխանություն, ի՞նչ է նշանակում իշխանություն, ի՞նչ լծակ»: