Ի՞նչ գաղտնի պայմանավորվածություններ են եղել

ԱԺ-կառավարություն հարց ու պատասխանին այսօր վարչապետ Կարեն Կարապետյանը չէր ներկայացել, ինչպես հայտնի է այսօր ԵԱՏՄ վարչապետերի մասնակցությամբ միջկառավարական խորհրդի նիստը կայացավ Երեւանում, թեեւ նիստն ավարտվել էր արդեն, սակայն Կարեն Կարապետյանը այդպես էլ չներկայացավ հարցուպատասխանին, որը Սահմանադրությամբ է պարտադրված: Կառավարության նրա ենթակա անդամները ողջ հարցուպատասխանի ընթացքում զրույցի էի բռնվել իրար հետ, կառավարության օթյակում բարձիթողի վիճակ էր, սակայն անգամ վարչապետի բացակայությունը չխանգարեց, որպեսզի Ելք-ը գրոհ ձեռնարկի նրա ուղղությամբ: Հարկ է նշել, որ Ծառուկյան դաշինքի խմբակցության պատգամավորների հարցերն անշառ էին եւ գլոբալ խնդիրներ էին շոշափում, Կարինե Պողոսյանին, դիցուք, հետաքրքրում էր երկրում զբաղվածության մակարդակը, Սերգեյ Բագրատյանն էլ սահմանամերձ Խաչիկ գյուղի եւ Ելփինի ոռոգման ջրի խնդիրն էր բարձրաձայնում: Սակայն Ելք-ի վարքագծում ակնհայտ ագրեսիվություն էր նկատվում եւ հասցեական քննադատություն առ Կարեն Կարապետյանը: Այնինչ նախորդ նիստերին հարցուպատասխանի ժամանակ ընդդիմությանը կարելի էր բացակա դնել: Ելք խմբակցության ղեկավար Նիկոլ Փաշինյանի հարցը ուղղված էր վարչապետ Կարեն Կարապետյանին, թեպետ բոլորն էին տեսնում, որ նա դահլիճում չէ: «Այս դահլիճում հերյուրանքներ են հնչում, որ վարչապետ Կարեն Կարապետյանը բացակայում է Ազգային ժողով-կառավարություն հարց ու պատասխանից: Ես չեմ կարող հավատալ այդ սադրիչ լուրերին և անվստահություն եմ հայտնում սեփական աչքերիս, որոնք սխալ տեղեկատվություն են փոխանցում: Հայաստանի Սահամանդրության առաջին հոդվածում ասվում է, որ ՀՀ-ն իրավական պետություն է, իսկ Սահմանադրության 80-րդ հոդվածն արձանագրել է, որ եթե որևէ մեկը ՀՀ վարչապետ է, այս օրը այս ժամին երկրագնդի վրա ոչ մի ուրիշ տեղ չի կարող գտնվել: Ուստի, հարց ուղղում եմ վարչապետին»,- ասաց Փաշինյանը: Նա բարևեց վարչապետին, ասաց, որ ուրախ է, որ նա տիրապետում է իր սահմանադրական պարտականություններին: «Մամուլում վերջերիս լուրեր շրջանառվեցին, թե դուք Սերժ Սարգսյանի հետ պայմանավորվել եք, որ նա պետք է լինի վարչապետ, իսկ դուք փոխվարչաապետ: Ես խնդրում եմ պարզաբանեք այս լուրերը, որովհետև դա շատ կարևոր է: Ոմանք ձեզ փորձում էին ներկայացնել որպես փոփոխությունների ավետաբեր, և հիմա այս հարցի պատասխանից է կախված, թե դուք իրականում փոփոխությունների ավետաբեր եք, թե ճահճացման մունետիկ»,- հարցրեց Նիկոլ Փաշինյանը: Նա սպասեց, որ վարչապետը պատասխանի իր հարցին: ԱԺ նախագահ Արա Բաբլոյանն ասաց, որ հավանաբար վարչապետը հաջորդ հարց ու պատասխանի ժամանակ կպատասխանի: «Պարոն վարչապետ, ես հասկանում եմ, որ դուք այս հարցին պատասխանելու համար մտածելու կարիք ունեք, և ես ձեզ սիրով տրամադրում եմ այդ ժամանակը: Մտածեք և հաջորդ անգամ պատրաստված եկեք»,- ասաց Փաշինյանը՝ հանդիսատեսին տեղափոխելով մանկապարտեզի մսուր խմբի տոնական հանդեսի մթնոլորտ: Ինչպես տեսնում եք, կենացները գնալով քաղցրանում են, մինչ Ծառուկյան դաշինքում դիրքավորված սպասում են իշխանության վերաբաշխմանը, Ելք-ում գործի են անցնում ու առաջին հարվածը Կարեն Կարապետյանին է: Ելք խմբակցության պատգամավոր Էդմոն Մարուքյանն օրինակ անդրադարձավ 2013 թվականին ՀՀ խորհրդարանի կողմից հայ-ռուսական գազային պայմանագրի վավերացմանը, որով 20 տոկոս վերջին բաժնեմասը տրվեց ռուսական կողմին: «Եվ նաև պարտավորվեցինք, որ մինչև 2043 թվականը չենք ընդունելու որևէ օրենք, որոշում, որը կառնչվի նրանց համար հարկային ռեժիմին: Ասացինք, որ դրանից հետո ռուսական կողմը չի թանկացնելու մեր գազը: Դրանից հետո ՀՀ-ն միացավ ԵՏՄ-ին, և էլի մեզ ասվեց, որ գազը չի թանկանա: Մենք էլ ուրախ ու երջանիկ գնացինք ու միացանք այդ միությանը: Մեկ էլ Ռուսաստանի վարչապետ Դմիտրի Մեդվեդևը երեկ Երևանում հայտարարում է, որ՝ մենք նման համաձայնության ենք հասել, որ գազը չի թանկանա այն դեպքում, երբ նախապես այլ պայմանավորվածություններ կային, այլ նորմեր էինք կիրառելու գազիֆիկացման հետ կապված: Եվ ի ուրախություն բոլորի՝ գազը չի թանկանա: Ես ուզում եմ հասկանամ՝ էս ի՞նչ գաղտնի պայմանավորվածություններ են եղել: Այսինքն՝ բանակցություններ են գնացել գազը թանկացնելու մասին, մենք չգիտե՞նք»,- հարցրեց Մարուքյանը: Փոխվարչապետ Վաչե Գաբրիելյանն ի պատասխան ասաց, որ այսօր Հայաստանը սահմանին գազ է գնում 150 դոլարով, որը տարածաշրջանում ամենացածր գինն է: Եվ գինը սահմանված է ու միշտ սահմանվում է որոշակի հատվածի համար: «Մենք երբևէ տասնամյակում գազի գին պայմանավորված չկանք, քանի որ ռուսական կողմը որևէ մեկի հետ նմանատիպ շատ երկար պայմաններ չի կնքում: Մեզ հետ նույնպես պայմանագիրը կնքված էր մինչև 2018 թվականը, հիմա երկարում է ևս մեկ տարով: Հիմա ընդամենը ֆիքսվում է, որ գազի գնի բարձրացում տեղի չի ունեցել, և այդ գինը շարունակվում է գործել նաև եկող տարի: Բարձրացման վերաբերյալ որևէ պայմանագիր կամ համաձայնություն չկա: Կա ընդամենը ժամկետ, որը երկարացվում է»,- ասաց Վաչե Գաբրիելյանը: Էդմոն Մարուքյանը հորդորեց փոխվարչապետին ՀՀ քաղաքացիներին գազի իրական գին ասել, ոչ թե հայտարարել, թե 150 դոլարով ենք գազ գնում: Իրականում սպառողի վրա այն կրկնակի թանկ է նստում: Պատգամավորը հետաքրքրվեց՝ հնարավո՞ր է, որ 2018 թվականից հետո Հայաստանում գազը թանկանա: Վաչե Գաբրիելյանն ասաց, որ գազի գինը Հայաստանում չի բարձրացրել և 2018 թվականին ևս բարձրանալու որևէ միտում չունի: Անի Սահակյան