Էմմա Թումանյանը նախընտրեց ցուցահանդես կազմակերպել Հայաստանում, այն դեպքում, երբ գայթակղիչ առաջարկներ ուներ արտասահմանից. լուսանկարներ

Այսօր՝ հոկտեմբերի 25-ին, Հայաստանի նկարիչների միության տանը տեղի ունեցավ երիտասարդ նկարչուհի Էմմա Թումանյանի  նկարների երկրորդ ցուցահանդեսը: «Էմման սկսել է նկարել մանուկ հասակից, երբ դեռ 7-8 տարեկան էր, իսկ ավելի լուրջ հենքի վրա ստեղծագործել սկսել է 2014 թվականից»,- այսօր Նկարիչների միությունում տեղի ունեցած ցուցահանդեսին, ներկայացնելով դստեր` Էմմա Թումանյանի ստեղծագործական գործունեությունն, ասաց հայրը` Կարեն Թումանյանը: Երիտասարդ նկարչուհու առաջին անհատական ցուցահանդեսը տեղի է ունեցել 2015 թվականին: Հոր խոսքով` այն հիմնականում ընդգրկում էր սոցիալական թեմաներ, իսկ այս ցուցահանդեսում թեման տարբեր է. «Ինչ տեսնում` նկարում է, ինչ մտածում է` կտավին է հանձնում: Խառնում է գույներն ըստ տրամադրության և ստացվում է այն, ինչը հագեցնում է ներքին պահանջը»: Արվեստասերների դատին հանձնվեց 40 կտավ –յուղաներկ: Պետք է նշել, որ երիտասարդ նկարչուհին իր մտածելակերպով, գույների ու  կերպարների համադրությամբ տարբերվում է շատ-շատերից: Երիտասարդ նկարչուհու  կտավները անտարբեր չթողեցին ոչ ոքի, ուրախալի է, որ նրա գործերը նայելու էին եկել նաև երիտասարդ սերնդի շատ ներկայացուցիչներ, դերասաններ, ապագա նկարիչներ, ստեղծագործող մարդիկ և նրանք բոլորն էլ միաբերան նշում էին, որ ԷմմաԹումանյանը  ինքնատիպ մտածելակերպով և ուրույն վրձին ունեցող նկարչուհի է: Կա մի հանգամանք ևս, որը հպարտանալու և ուրախանալու տեղիք է տալիս: Արտասահմանյան տարբեր կազմակերպություններից ցանկություն են հայտնել նրա նկարների ցուցահանդես-վաճառք  կազմակերպել իրենց մոտ, սակայն Էմման նախընտրել է ցուցահանդես կազմակերպել իր երկրում, իր  սիրելի քաղաքում: ՛՛Էմման  մեր երկրի սիրահարն է,-ասում էին Էմմային ճանաչողները: