Դավիթ Տոնոյանը մորը տեսակցել է առանց ձեռնաշղթաների. Վահե Դոլմազյանի կարգապահական վարույթի հիմքը

ԲԴԽ-ում քննվել է հակակոռուպցիոն դատարանի դատավոր Վահե Դոլմազյանի նկատմամբ հարուցված կարգապահական վարույթը։

«Փաստինֆոյի» փոխանցմամբ՝ ՀՀ արդարադատության նախարարության ներկայացուցիչը ԲԴԽ-ում հայտնեց, որ վարույթ հարուցելու առիթ է հանդիսացել ԱՆ ՔԿԾ պետ Համբարձում Գրիգորյանի՝ 2024 թ-ի մարտի 20-ին ներկայացրած հաղորդումը։

Ըստ վարույթի՝ դատավորի կողմից թույլ են տրվել դատավարական իրավունքի նորմերի խախտումներ։ Մասնավորապես, «Ձերբակալված և կալանավորված անձանց տեղափոխելու մասին» ՀՀ օրենքի մի շարք խախտումներ, այն է՝ կարճաժամկետ մեկնումներ տրամադրելու շրջանակում մեկնման և վերադարձի համար անհրաժեշտ ժամանակ տրամադրելու և մեկնման իրականացման եղանակը որոշելու լիազորության բացակայության պայմաններում՝ դատավորը լուծել է այդ հարցերը։

Դատավորը որոշում է կայացրել, որ պետք է 2 ժամվա ընթացքում, կարճաժամկետ մեկնման համար սահմանման վայրից կալանավորված անձը վերադառնա ՔԿՀ, որ մեկնումը պետք է իրականացվի առանց ձեռնաշղթայի կիրառման։ Ընդ որում՝ վարույթ հարուցած մարմնի գնահատմամբ՝ ԱԺ շենքից Արդարադատության նախարարության «Երևան-Կենտրոն» ՔԿՀ տեղաշարժվելու համար օբյեկտիվորեն անհարկի երկար ժամանակահատված է։

ԱՆ ներկայացուցիչը հայտնեց, որ վերոնշյալը հանգեցրել է «Դատական օրենսգիրք» Սահմանադրական օրենքի հոդվածների խախտման։ Ավելին՝ խախտվել է նաեւ արդար դատաքննության իրավունքը։ «Դատավորը լուծել է այնպիսի հարցեր, որոնց լուծման իրավասությունը չուներ»,- գտնում է ԱՆ-ի ներկայացուցիչը՝ ավելացնելով, որ դատավորը կարող էր և պարտավոր էր գիտակցել իր կատարած խախտումը և դրա իրավական հետևանքները։

Դոլմազյանը պնդեց, որ չի պահպանվել դատավորի նկատմամբ կարգապահական վարույթ հարուցելու ընթացքը, քանի որ դատավորի նկատմամբ կարգապահական պատասխանատվության ենթարկելու մասին միջնորդության և ԲԴԽ-ում միջնորդություն ներկայացնելու միջև ընկած ժամանակահատվածը չի կարող 2 ամսից ավելի լինել, մինչևդեռ իր նկատմամբ կարգապահական վարույթ հարուցելու որոշում է կայացվել 2024 թ-ի ապրիլի 15-ին, իսկ ԲԴԽ այն ներկայացնելու որոշումը կայացվել է հունիսի 17-ին, նիստ գումարվել է հունիսի 20-ին։ Այսինքն՝ միայն այս թվերից կարելի է ենթադրել, որ 2 ամիսը պահպանված չէ։

ԲԴԽ-ում հարցուպատասխանից հետո ինչպես Արդարադատության նախարարության ներկայացուցիչը, այնպես էլ դատավոր Դոլմազյանը հրաժարվեցին եզրափակից ելույթներից։

Խորհուրդը գնաց խորհրդակցական սենյակ՝ որոշում կայացնելու. այն կհրապարակվի օգոստոսի 5-ին՝ ժամը 10.00-ին։