Քանաքեռ-Զեյթուն համայնքի ղեկավարը 2023 թ-ին ձեռք է բերել 2 նոր բնակարան Երևանում

Երևանի Քանաքեռ-Զեյթուն համայնքի ղեկավար Արտակ Հովակիմյանը 2023 թ-ին ձեռք է բերել 2 նոր բնակարան Երևան քաղաքում։ Ըստ 2024 թ-ի ապրիլին ներկայացրած հայտարարագրի՝ բնակարաններից մեկի 23 մլն 400 հազար դրամ է, մյուսը՝ 59 մլն 600 հազար դրամ։

Նա նաև հայտարարագրել է 2 անհատական բնակելի տուն, որոնցից մեկը ձեռք է բերել 2013 թ-ին, մյուսը՝ 2016 թ-ին, ինչպես նաև 2021 թ-ին ձեռք բերած հասարակական նշանակությոն շինությունը։

Նշենք, որ եկամուտների բաժնում նա հայտարարագրել է տարվա ընթացքում ստացած 81 մլն 780 հազար դրամ եկամուտը, որից 73 մլն դրամը «ԱԿԲԱ ԲԱՆԿ»-ից ստացված վարկն է, իսկ 8 մլն 780 հազար դրամը՝ «Երևանի քաղաքապետարանի աշխատակազմից աշխատանքի դիմաց ստացած վարձատրությունն է։

Դեկտեմբերի 31 –ի դրությամբ նրա ստացած վարկերի և փոխառությունների մայր գումարի մնացորդը կազմել է 70 մլն 196 հազար դրամ։

Հատկանշական է, որ մեկ տարի առաջ՝ 2022 թ-ի հայտարարագրում նրա 6 տարբեր վարկերի և փոխառությունների մայր գումարի մնացորդ ընդհանուր առմամբ կազմում էր 178 մլն 153 հազար դրամ։ Դրանից ամենամեծը հասարակական նշանակության տարածքի համար վերցված 134 մլն 639 հազար դրամի վարկն է, 2-ը՝ 2 մլն 615 հազար դրամի և 22 մլն 896 հազար դրամի վարկը վերցվել էր բնակելի տան ձեռք բերման նպատակով։ 2023 թ-ի հայտարարագրում այս վարկային գծերի առկայության մասին տեղեկատվությունը բացակայում է։

2023 թ-ն նա նաև հայտարարագրել է իր բանկային ավանդները, ըստ այդմ՝ դրամային 2 ավանդներից մեկի չափը 11 մլն 300 հազար դրամ է, երկրորդը՝ 18 մլն 540հազար դրամ, մյուս 4 ավանդային հաշիվները դոլարային են, նրանցից մեկի մայր գումարը տարեվերջին կազմել է 51 340 դոլար, երկրորդը՝ 15 450 դոլար, երրորդը՝ 11 330 դոլար, իսկ չորրորդին՝ 7 210 դոլար։
Տարեվերջին Հովակիմյանի բանկային 3 հաշիվներից 2-ի վրա եղել է 850 հազարական դրամ, իսկ երրորդին՝ 522,806 դրամ, կանխիկ դրամ՝ Հովակիմյանն հայտարարագրել է 20 000 եվրո գումար։