Նախկին դատախազի հանելուկային մահը. «զենքի հետ անզգույշ վարվելու» վարկածը նախնական է. զենքը գնել էր ինքնասպանության նպատակո՞վ

Գեղարքունիքի մարզի նախկին դատախազ Կարեն Խաչատրյանի մահվան հանգամանքները պարզվում են։ Իրավապահները քննության առարկա են դարձնում մի քանի վարկածներ։

Հիշեցնենք, որ Կարեն Խաչատրյանի հրազենային վիրավորմամբ անշնչացած մարմինը հայտնաբերվել է հուլիսի 07-ին՝ սեփական տանը։ 2024թ․ հուլիսի 07-ին՝ ժամը 00։35-ին, «Վարդենիս» ԲԿ-ից ահազանգ է ստացվել առ այն, որ Գեղարքունիքի մարզի Լուսակունք գյուղում կանչով մեկնած շտապօգնությունն արձանագրել է 4-ամյա Կարեն Խաչատրյանի մահը՝ հրազենի գործադրմամբ։ Դեպքի փաստով 2024թ. հուլիսի 07-ին ՀՀ քրեական օրենսգրքի 155-րդ հոդվածի 1-ին մասի հատկանիշներով ՀՀ ՔԿ Գեղարքունիքի մարզային քննչական վարչության Վարդենիսի քննչական բաժնում նախաձեռնվել է քրեական վարույթ։ ՀՀ ՔԿ-ն ի սկզբանե շրջանառության մեջ է դրել զենքի հետ անզգույշ վարվելու հետևանքով ստացված հրազենային վիրավորում ստանալու վարկածը։ Մասնավորապես, ՔԿ մամուլի քարտուղար Գոռ Աբրահամյանը ֆեյսբուքյան իր էջում գրել էր, որ նախաքննության շրջանակում ստացված խիստ նախնական, քննությամբ դեռևս լիարժեք ստուգման ենթակա տվյալներով Կ. Խաչատրյանը նույն օրը՝ ժամը 00։30-ի սահմաններում, իրենց տանը, իրեն ամրակցված «BERETTA APX» տեսակի հրազենը մաքրելու ժամանակ զենքի հետ անզգույշ վարվելու հետևանքով արձակված կրակոցից ստացել է կյանքի հետ անհամատեղելի հրազենային վնասվածք։

«Դեպքի վայրի զննությամբ, բնակարանի հյուրասենյակում հայտնաբերվել է Կ. Խաչատրյանի մարմինը` աջ աչքի հատվածում հրազենային վնասվածքով։ Առգրավվել է հիշյալ հրազենը, մեկ կրակված պարկուճ, վերցվել են արյան հետքեր։ Նշանակվել են դիակի դատաբժշկական, դատաձգաբանական, դատակենսբանական և դատաքիմիական փորձաքննություններ»,- գրել էր նա։

Թե ինչպես է ստացվել, որ բազմամյա փորձառություն ունեցող դատախազը զենքի հետ վարվել չի իմացել կամ անզգույշ է վարվել, կամ առհասարակ՝ մաքրել է զենքը՝ լիցքավորված վիճակում՝ տարակուսանք է առաջացրել։ Ընդ որում, նշված զենքը նա ձեռք էր բերել դեպքից ընդամենը օրեր։

Սա սոսկ դժբախտ պատահար էր, ինքնասպանություն, որի նպատակով էլ նախկին դատախազը ձեռք էր բերել զենքը, թե հանցավոր այլ դրսեւորման հետ գործ ունենք։

Միևնույն ժամանակ, վարույթն իրականացնող մարմինն առ այժմ զերծ է մնացել հիշատակել ինքասպանության հնարավոր վարկածը։

ՔԿ-ից վստահեցնում են, որ քննություն է տարվում հնարավոր բոլոր վարկածների ուղղությամբ, իսկ «զենքի հետ անզգույշ վարվելու» վարկածը նախնական է՝ ըստ այդ պահին ստացված տվյալների։
«Համակողմանի քննությամբ պարզվում են կատարվածի ամբողջական հանգամանքները, այդ թվում՝ զենքի ձեռբերման, հնարավոր անզգուշության դրսևորման և այլն»,- մեզ հետ զրույցում նշեց Գոռ Աբրահամյանը՝ զերծ մնալով հավելյալ տեղեկատվություն այժմ հրապարակելուց։

Հեղինակ՝ Իզաբել Սահակյան

Աղբյուր` Փաստինֆո