Արարատի մարզում բախվել են Lexus-ն ու «Վազ 2107»-ը, վերջինը գլխիվայր շրջվել է. կա վիրավոր

Երեկ՝ հուլիսի 6-ին, խոշոր ավտովթար է տեղի ունեցել Արարատի մարզում։ Ժամը 23:40-ի սահմաններում ՀՀ Ներքին գործերի նախարարության Ոստիկանության Արարատի մարզային վարչությունում և ոստիկանության Արարատի բաժնում օպերատիվ տեղեկություններ են ստացվել, որ Արարատ գյուղի՝ ժողովրդին հայտնի «Կիլիկիայի» խաչմերուկում, ավտովթար է տեղի ունեցել և կա տուժած։

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ոստիկանության Արարատի մարզային վարչության պետ Սարիբեկ Ռուստամյանը, վարչության պետի օպերատիվ գծով տեղակալ Մամիկոն Հակոբյանն ու ոստիկանության Արարատի բաժնի պետ Ֆիլիպպ Ստեփանյանը։

Օպերատիվորեն ժամանել են նաև ՀՀ ՆԳՆ Փրկարար ծառայության Արարատի հրշեջ-փրկարարական ջոկատից 1 մարտական հաշվարկ։

Ժամանել են նաև ՀՀ ՆԳՆ Ոստիկանության Պարեկային ծառայության Արարատի մարզի գումարտակի 2-րդ վաշտի պարեկները՝ գումարտակի հրամանատար Գրիգոր Բաբաջանյանի, գումարտակի հրամանատարի տեղակալ Աբել Վարդանյանի, գումարտակի ծառայության ավագ տեսուչ Արթուր Կոծինյանի, վաշտի հրամանատար Գարուշ Սարգսյանի և վաշտի հրամանատարի տեղակալ Սահակ Թադևոսյանի գլխավորությամբ։

Տարածքը սահմանազատել են նույն վաշտի պարեկներ Վլադիմիր Ղազարյանն ու Վոլոդյա Հովհաննիսյանը։

Պարեկների այսքան շատ ժամանման պատճառը նրանում էր, քանի որ վթարից հետո հետաքրքրասեր վարորդները կայանել էին ավտոմեքենաները և ստեղծվել էր խցանում, սակայն ոստիկանների ու պարեկների ժամանումից րոպեներ անց երթևեկությունը կարգավորվեց։

Տեղում պարզվել է, որ Արարատ գյուղի Գրիբոյեդով փողոցի թիվ 130 հասցեի դիմաց բախվել են Արարատի մարզի բնակիչներ 44-ամյա Համլետ Ս.-ի վարած «Lexus» մակնիշի և 41-ամյա Կարեն Խ.-ի վարած «Վազ 2107» մակնիշի ավտոմեքենաները։

Բախման հետևանքով «07»-ը գլխիվայր շրջվել է՝ մասամբ հայտնվելով ճանապարհի մեջտեղում։

Վթարի հետևանքով 1 հոգի տեղափոխվել է հիվանդանոց

Հրշեջ-փրկարարները հոսանքազրկել են ավտոմեքենաները, տեղում իրականացրել հերթապահություն։

Վթարի մասին ոստիկանության Արարատի բաժնից տեղեկությունը փոխանցել են ՀՀ քննչական կոմիտեի Արարատի մարզային քննչական վարչության Վեդիի քննչական բաժին, որտեղից ժամանել է քննչական խումբը՝ վարչության պետի տեղակալի և օրվա պատասխանատու հերթապահ քննիչի գլխավորությամբ։

Վթարի փաստով Վեդիի քննչական բաժնում նախաձեռնվել է քրեական վարույթ, որտեղ էլ պարզում են վիրավորի ինքնությունը։