Կոռուպցիայի մեջ մեղադրվող Իսպանիայի վարչապետի կինը դատարանում ցուցմունք է տվել

Իսպանիայի վարչապետ Պեդրո Սանչեսի կինը՝ Բեգոնյա Գոմեսը, ներկայացել է դատարան՝ մեղադրյալի կարգավիճակով ցուցմունքներ տալու համար։ Բեգոնյա Գոմեսը մեղադրվում է գործարար շրջանակում իր կապերը անձնական նպատակով օգտագործելու և կոռուպցիայի մեջ։

Իսպանիայի վարչապետի կնոջ անվտանգությունն ապահովելու համար մեծ թվով ոստիկաններ են կուտակվել դատարանի մոտ, որտեղ հանրահավաք են անցկացնում բազմաթիվ քաղաքացիներ՝ իրենց բողոքը հայտնելով տեղի ունեցածի կապակցությամբ և հնչեցնելով Իսպանիայի վարչապետի հրաժարականի կոչեր։

Ինչպես հայտնում է El Confidencial պարբերականը, ժամանակակից Իսպանիայի պատմության մեջ առաջին անգամն է, երբ վարչապետի կինը ցուցմունք է տալիս դատարանում՝ մեղադրյալի կարգավիճակով։

Նշենք, որ ավելի վաղ Մադրիդի դատարանը ուժի մեջ էր թողել Իսպանիայի վարչապետ Պեդրո Սանչեսի կնոջ՝ Բեգոնյա Գոմեսի նկատմամբ հետաքննություն սկսելու որոշումը․ նա, ինչպես արդեն նշվեց, մեղադրվում է գործարար շրջանակում իր կապերն անձնական նպատակով օգտագործելու և կոռուպցիայի մեջ։ Դատախազությունը խնդրել էր կարճել գործը, սակայն Մադրիդի դատարանը մերժել էր։

Գործի հիմքում Գոմեսի հարաբերություններն են մի քանի մասնավոր ընկերությունների հետ, որոնք կառավարությունից ստացել են միջոցներ և կնքել են պետական ​​պայմանագրեր։

Կնոջ նկատմամբ հետաքննություն սկսվելուց հետո Իսպանիայի վարչապետը չեղարկել էր իր մասնակցությամբ հանրային միջոցառումները՝ այդ ընթացքում որոշում կայացնելու համար՝ մնալո՞ւ է արդյոք իր պաշտոնում, ինչից հետո հայտարարել էր, որ որոշել է առայժմ հրաժարական չտալ։