«Որոշումները ԱԺ դահլիճում չեն ընդունվում, սա ընդամենը արարողակարգ է». պատգամավոր
ԱԺ-ում այսօր «Քրեադատավարական օրենսգրքում» փոփոխություններ կատարելու մասին նախագիծը մերժվեց 34 կողմ, 51 դեմ եւ 6 ձեռնպահ ձայներով: Նախագծի համահեղինակն էր «Ծառուկյան» խմբակցության պատգամավոր Նաիրա Զոհրաբյանը: Վարման կարգով Ելք խմբակցության պատգամավոր Էդմոն Մարուքյանը նշեց, որ այս նախագիծը բացասական եզրակացություն է ստացել նրա համար, որ տուժողների ու վկաների համար չի ներկայացվել. «Տեսաձայնագրության պարագայում էլ կարող էինք տեսնել, որ այդ մարդու աչքը կապտած է, կամ ծեծել են, նոր են հարցաքննել»: ՀՀԿ պատգամավոր Գեւորգ Կոստանյանն իր հերթին արձագանքեց՝ ասելով. «Խոշտանգումը միայն աչք կապտացնելով չի լինում, կարող է հոգեբանական ճնշման էլ ենթարկված լինի, որը տեսաձայնագրությամբ չի երեւա»: Ելք խմբակցության պատգամավոր Արտակ Զեյնալյանն էլ արձագանքեց. «Չեք թողնում՝ անգամ ԱԺ-ում քննարկել նախագիծը, հնչեցնել կարծիքները: Դա նշանակում է, որ որոշումները ԱԺ դահլիճում չեն ընդունվում, սա ընդամենը արարողակարգ է»:
Հետևեք մեզ Viber-ում
