Նոյեմբերյանի ԵԿՄ ղեկավար Յուրա Հարությունյանին մեղադրանք է ներկայացվել

«Փաստինֆո»-ի տեղեկություններով՝ Նոյեմբերյանում բողոքի ակցիայի գործով մեղադրանք է ներկայացվել ԵԿՄ մարզային ղեկավարին՝ Յուրա Հարությունյանին, որը ԵԿՄ ավտոմեքենան վարել էր խաղաղ ակցիայի մասնակիցների ուղղությամբ։

Հիշեցնենք, որ Տավուշի մարզում՝ «Տավուշը հանուն հայրենիքի» շարժման կողմից խաղաղ անհնազանդության ակցիաները Տավուշի մարզում՝ դեռևս ապրիլին, բավականին լարված իրավիճակում են անցել։ Նոյեմբերյանում, երբ ապօրինի սահմանազատման և հայկական հողերն Ադրբեջանին փոխանցելու դեմ պայքարող տավուշցիները փակել էին ճանապարհները, ԵԿՄ մարզային բաժնի ղեկավար Յուրա Հարությունյանի հրահանգով ԵԿՄ ավտոմեքենան երկու անգամ մխրճվել է քաղաքացիների մեջ, ինչի հետևանքով քաղաքացիներից մեկը գլխի վնասվածք է ստացել։

Այսօր ավելի վաղ ՔԿ-ն հաղորդել էր՝ Նոյեմբերյանում տեղի ունեցած բողոքի ակցիայի գործով զարգացումների մասին։ Մասնավորապես, ՔԿ-ն հայտնել էր․ «Այսպես՝ Տավուշի մարզի, ինչպես նաև ՀՀ տարբեր բնակավայրերի տարածքներից Նոյեմբերյան համայնքի Երևանյան փողոց ժամանած բազմաթիվ քաղաքացիներ, ՀՀ պետական մարմինների կողմից սահմանագծման և սահմանազատման հարցերի շուրջ ունեցած դժգոհությունների պատճառով, 2024թ. ապրիլի 23-ին՝ ժամը 11:00-ի սահմաններում, խաթարելով երթևեկության բնականոն ընթացքը, տևական ժամանակ արգելափակել են միջպետական ճանապարհահատվածը, որի հետ կապված նշված տարածք էր եկել նաև Տավուշի մարզի բնակիչ Յ.Հ.-ն՝ իր ծանոթների հետ:

Այդ ընթացքում Յ.Հ.-ի ընկերոջ և ճանապարհն արգելափակած անձանց միջև բանավեճ է սկսվել՝ ճանապարհը բացելու հարցի շուրջ, որի ընթացքում ակցիայի մասնակիցներից մեկը, որդու և չպարզված անձանց հետ միասին, իրենց անձի ենթադրյալ առավելությունն ու գերակայությունն ընդգծելու, ներկաների մոտ սարսափ առաջացնելու նպատակով, իրավական և բարոյական նորմերի նկատմամբ բացահայտ արհամարհական վերաբերմունք դրսևորելով, բռնության գործադրմամբ, խուլիգանություն էին կատարել, որի ընթացքում ակցիայի մասնակիցներից մեկը հարվածել է Յ.Հ.-ին և ստիպել հեռանալ:

Չհանդուրժելով տեղի ունեցածը՝ վերջինս, քննությամբ դեռևս չպարզված անձանց հետ միասին, ժամը 16:00-ի սահմաններում վերադարձել են Երևանյան փողոցում հավաքված բողոքի ակցիայի մասնակիցների մոտ և իրավական ու բարոյական նորմերի նկատմամբ բացահայտ արհամարհական վերաբերմունք ցուցաբերելով, համակեցության կանոնների ցուցադրաբար անտեսմամբ, մարդկանց անդորրը խախտելով, արհամարհելով տեղում ծառայություն իրականացնող ոստիկանության աշխատակիցների օրինական պահանջները, սկսել են հայհոյանքներ և անպարկեշտ արտահայտություններ հնչեցնել ներկաների հասցեին, ինչը վեր է ածվել քաշքշուկի:

Միջադեպի մասնակիցների գործողությունները դադարել են՝ ՀՀ ՆԳՆ ոստիկանության տարբեր ստորաբաժանումների ծառայողների կողմից իրականացված կանխարգելիչ գործողությունների արդյունքում:

Դեպքերի առթիվ նախաձեռնվել են քրեական վարույթներ, որոնք միացվել են։

Նախաքննությամբ ձեռք բերված բավարար փաստերի հիման վրա՝ ՀՀ քրեական օրենսգրքի 297-րդ հոդվածի 2-րդ մասի 1-ին կետով Յ.Հ.-ին ներկայացվել է մեղադրանք:

Վերջինիս մասով նախաքննությունն ավարտվել է, և վարույթի նյութերն ուղարկվել են հսկող դատախազին՝ մեղադրական եզրակացությունը հաստատելու և դատարան ուղարկելու համար»։

Հեղինակ՝ Իզաբել Սահակյան

Աղբյուր` Փաստինֆո