Բագրատ Սրբազանի հրավերով քաղաքական ուժերի հանդիպումը թեժ է անցել

Բագրատ Սրբազանի հրավերով քաղաքական ուժերի հանդիպումն այսօր անցել է բավական թեժ մթնոլորտում։ Քննարկմանը ներկա են եղել քաղաքական ուժերի շուրջ 40 ներկայացուցիչ։

«Ազգային Անվտանգություն» կուսակցության ղեկավար Գառնիկ Իսագուլյանի
փոխանցմամբ` Սրբազանը ցանկանում էր իմանալ յուրաքանչյուրի տեսակետը պայքարի ընթացքի վերաբերյալ, լսել առաջարկությունները:

«Պետք է ասեմ, որ բավական ազատ ու անկեղծ քննարկում էր։ Բոլոր հարցերի շուրջ էլ քննարկումներ եղել են, սակայն կան ուժեր, որոնց հայացքները տրամագծորեն տարբեր են ոչ միայն արտաքին քաղաքականության, այլև ներքին քաղաքականությանը վերաբերող հարցերի շուրջ։ Օրինակ, մեր՝ «Ազգային անվտանգություն» և ԱԺԲ-ի տեսակետները տրամագծորեն տարբեր են արտաքին քաղաքականությանը վերաբերող հարցերում, սակայն մեր տեսակետը համընկնում է մեկ կարևոր հարցում ՝ գործող իշխանությունները, որոնք չեն ներկայացնում Հայաստանի և հայության շահերը և պետք է օր առաջ հեռացվեն իշխանությունից։ Ընդ որում՝ բոլորը պնդում են, որ դա պետք է լինի օրինական ճանապարհով։ Այսինքն, մեզ բոլորիս միավորում է օրվա իշխանությունից օր առաջ ազատվելու հարցը»,-
«Փաստինֆոյի» հետ զրույցում ասաց Գառնիկ Իսագուլյանը։

Անդրադառնալով քաղաքական խորհրդի ձևավորմանը՝ նա նշեց, որ իրավական առումով խորհուրդ ձևավորված չէ, բայց այն կորիզը, որ մշտապես հավաքվում ու քննարկումներ է ունենում՝ առկա է։

«Ընդհանուր քննարկման արդյունքում մենք եկանք եզրակացության, որ այն լինելու է խորհրդատվական մարմին, որը պարբերաբար հավաքվելու է ու իր առաջարկներն է ներկայացնելու»։

Գ.Իսագուլյանի փոխանցմամբ` ամենաթեժ քնարկումը, բնականաբար, եղել է պայքարի ընտրված մեթոդոլոգիայի շուրջ։ Այս հարցում կան տարբեր տեսակետներ. մի մասը գտնում է, որ շարժումը ինչ-որ առումով թուլացել է, մարդիկ կան, որոնք գտնում են, որ այս պարագայում մենք ավելի ուժեղացնում ենք Նիկոլ Փաշինյանի իշխանությունը; «Բայց այս քննարկման արդյունքում մենք եկել ենք այն եզրակացության, որ շարժումը ոչ միայն չի մարել, այլև հասել է մի փուլի, երբ հստակ գործողությունների պլան պետք է լինի, կառուցվածքային ինչ-որ բան պետք է ձևավորվի։

«Օրինակ, ես պնդում եմ, որ մարզային այցերը լավ են, բայց դրանց արդյունքում մարզերում ինչ-որ բան պետք է մնա՝ մեր հետ վերադառնալուց հետո։ Օրինակ Ղարաբաղյան շարժման ժամանակ, երբ «Ղարաբաղ» կոմիտեն ինչ-որ տեղ էր գնում՝այնտեղ ձևավորվում էին շրջանային կոմիտեներ, քաղաքային կոմիտեներ, գյուղական կոմիտե, այսինքն, պետք է կառուցվածք ձևավորել, պետք է հետ վերադառնալիս՝ այնտեղ հետք թողնել», - ասաց Իսագուլյանը` ընդգծելով մարզերում կառույցներ ձևավորելու կարեւորությունը:

«Բոլորս գիտակցում ենք, որ ամառվա այս 3 ամիսները բավական շոգ են լինելու, բայց այս ընթացքում պետք է մարզեր գնալ, կառույցներ ձևավորել, որովհետև հիմնական պայքարը լինելու է սեպտեմբեր-հոկտեմբեր ամիսներին։ Դրա համար, կարծում եմ, մենք չպետք է ելնենք այն մտայնությունից, որ Նիկոլը վաղը հրաժարական է տալու, ոչ վաղը չի տալու, հետևաբար, մենք պետք է 3-ամսյա ժամկետ դնենք ու դրա ընթացքում ձևավորենք ինչ-որ կառույց, որը օպերատիվ արձագանքում է կոորդիանցիոն խորհրդի կոչերին ու տեղերում աջակցի աշխատանքներին»։

Աղբյուր` Փաստինֆո