ՀՀ ԶՈւ-ին արգելված է Երասխով դեպի Վայոց ձոր տեղաշարժը. ՊՆ-ից չեն արձագանքում
![ՀՀ ԶՈւ-ին արգելված է Երասխով դեպի Վայոց ձոր տեղաշարժը. ՊՆ-ից չեն արձագանքում](/timthumb.php?src=/disc/01-07-24/9874ba14f395bd2336dfe4186ea6bba3.jpg&w=708)
Վերջին օրերին շատ է քննարկվում, որ Հայաստանի Հանրապետության Արարատի մարզի Երասխ-Տիգրանաշեն ճանապարհով Զինված ուժերի տեղաշարժը դադարեցված է։
Այս թեմային անդրադարձել է նաև «ԴՕԿ» կուսակցության ղեկավար Վարդան Ղուկասյանը, նշել, որ նման պահանջ Ադրբեջանն է ներկայացրել.
«Ադրբեջանն արգելել է ՀՀ տարածքով ՀՀ զինված ուժերի տեղաշարժը։ Քյարքիով, (Տիգրանաշեն) Երասխով արգելված է զինտեխնիկայի տեղաշարժը, անգամ՝ մի հատ «Ուազ» չի կարող Երասխ-Տիգրանաշեն ճանապարհով գնալ Վայք։ Եթե գնում է, ապա Վեդիով՝ այդ ճանապարհը շրջանցելով»։
Ղուկասյանը, որպես օրինակ՝ նշել է հրետանային բրիգադի հրամանատարի դեպքը.
«Իր մաշկի վրա դա զգացել է հրետանային բրիգադի հրամանատար Պետրոսյանը, ով իր ծառայողական մեքենայով շարժվել է դեպի Վայոց ձոր։ Զինավտոտեսչությունը կանգնեցրել է և հետ է տվել, ասել է՝ այսպես մի գնացեք, այսպես չի կարելի գնալ, թուրքը չի թողնում»։
Oragir.News-ը պարզաբանում ստանալու նպատակով փորձեց կապ հաստատել ՊՆ մամուլի խոսնակ Արամ Թորոսյանի հետ, սակայն նա հեռախոսազանգերին չպատասխանեց։
Հիշեցնենք, որ Նիկոլ Փաշինյանը նախորդ տարի հրավիրած մամուլի ասուլիսի ժամանակ հայտարարել էր, որ ճանաչում է Ադրբեջանի 86.6 հազար քառակուսի կիլոմետր տարածքային ամբողջականությունը, որի մեջ ներառված են Արցախը և այսպես կոչված՝ անկլավները, որոնց թվում է նաև Տիգրանաշենը։
oragir.news