4-ը՝ 4-ի դեմ. Արուսյակ Ալեքսանյանի գործով ՍԴ դատավորների կարծիքը կիսվել է
![4-ը՝ 4-ի դեմ. Արուսյակ Ալեքսանյանի գործով ՍԴ դատավորների կարծիքը կիսվել է](/timthumb.php?src=/disc/28-06-24/e3e055e6117f8dd20c524b1d3c2caa58.jpg&w=708)
Երևանի ընդհանուր իրավասության դատարանի՝ ռեզերվային դատավորի կարգավիճակ ունեցող Արուսյակ Ալեքսանյանի և փաստաբան Էրիկ Ալեքսանյանի գործով դատաքննությունը մոտենում է ավարտին։ Այս մասին «Փաստինֆո»-ի հետ զրույցում ասաց փաստաբան Անդրանիկ Մանուկյանը։
Հիշեցնենք, որ 2022թ․ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությանն առնչվող գործին։
Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ դատավորին մեղադրում են ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։ Արուսյակ Ալեքսանյանը, դատավորի օգնական Թամարա Պետրոսյանը և Էրիկ Ալեքսանյանն իրենց ներկայացված մեղադրանքը չեն ընդունում։
Քրեական գործն արդեն տևական ժամանակ է, ինչ գտնվում է Հակակոռուպցիոն դատարանի դատավոր Վահե Դոլմազյանի վարույթում՝ դատաքննության փուլում։ Դատարանում արդեն ավարտվել է վկաների հարցաքննությունը, նրանց թվում էր նաև Երևանի ընդհանուր իրավասության դատարանի նախագահի նախկին պաշտոնակատար Գագիկ Պողոսյանը։ Դատարանն այժմ գտնվում է ապացույցներն անթույլատրելի ճանաչելու հարցի քննարկման փուլում, եթե միջնորդություններ չներկայացվեն, ապա դրանից հետո դատարանը վերդիկտ կկայացնի։
Դատաքննության փուլում ևս Արուսյակ Ալեքսանյանը գտնվել է կալանքի տակ, նրա խափանման միջոց կալանքը տնային կալանքով փոխարինվել է բոլորովին վերջերս։ Խափանման միջոցի փոփոխության հարցը մշտապես է բարձրացվել պաշտպանության կողմից, Վճռաբեկ դատարանի հակակոռուպցիոն պալատը մերժել է բողոքների վարույթ ընդունումը, ինչպով պայմանավորված դիմումներ են ներկայացվել ՍԴ, որոնք, թեև վարույթ են ընդունվել, քննվել, սակայն մերժվել են։
«Վճռաբեկ դատարանի հակակոռուպցիոն պալատի կռուպցիոն հանցագործությունների քննության դատական կազմը ժամանակին հրաժարվել է Արուսյակ Ալեքսանյանի՝ հատուկ վերանայման վճռաբեկ բողոքն ընդունել վարույթ։ Դրանից հետո դիմել ենք ՍԴ, որը քննության է ընդունել դիմումն, ընդ որում՝ երկու անգամ, բայց, ցավոք սրտի, քանի որ ՍԴ դատական կազմը ձևականորեն համալրված չէ, երեք դիմումներով ՍԴ-ն որոշում չկայացրեց, որովհետև Արուսյակ Ալեքսանյանի կալանքի հակասահմանադրականության հարցի վերաբերյալ ՍԴ դատավորների դիրքորոշումը բաժանվել է 4 կողմ և 4 դեմի, այդ պատճառով որոշում չընդունվեց, օրենքի ուժով էլ՝ համարվեց մերժված, բայց ՍԴ կողմից երկու անգամ իմ դիմումն ընդունելու փաստն արդեն իսկ վկայում է այն մասին, որ Վճռաբեկ դատարանն իրավունք չուներ վարույթ չընդունելու իմ բողոքը»,- ասաց փաստաբան Անդրանիկ Մանուկյանը՝ նշելով, որ ՍԴ-ն նույն գործով՝ այլ համատեքստում ներկայացված դիմումը՝ Վճռաբեկ դատարանի կողմից Արուսյակ Ալեքսանյանի իրավունքի խախտման վերաբերյալ, քննության է ընդունել, որոշմամբ արձանագրել, որ Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմը՝ իր երկու տողանի՝ «վարույթ ընդունումը մերժելու մասին որոշմամբ»՝ խախտել է Արուսյակ Ալեքսանյանի արդար դատաքննության իրավունքը։
«ՍԴ-ն սահմանադրական դիրքորոշում հայտնեց որոշմամբ, որ Վճռաբեկ դատարանն իրավունք չունի վարույթ չընդունելու որոշումները «քոփի փաստ» հնարքի կիրառմամբ պատճառաբանել ընդամենը երկու տողով։ Պետք է ծանրակշիռ կերպով պատճառաբանվի, թե ինչու վարուևյթ չի ընդունվում բողոքը»,- ասաց փաստաբանը՝ ցավով արձանագրելով, որ այդ որոշումից հետո Վճռաբեկ դատարանը շարունակում է նույն կերպ, «ոչինչ չի փոխվել, միայն փաստաթղթաշրջանառությունն է ավելացել»։ Նրա խոսքով՝ սրանից ավել փաստ, որ Վճռաբեկ դատարանի Հակակոռուպցիոն դատարանի կոռուպցիոն հանցագործությունների քննության դատական կազմը կատարում է ՀՀ-ում իրավական անվտանգությունը՝ այլևս գոյություն ունենալ չի կարող։
Հեղինակ՝ Իզաբել Սահակյան
Աղբյուր` Փաստինֆո