Հունվարից մինչեւ հիմա նայում են մեր աչքերի մեջ ու խաբում են՝ նախարարից սկսած, վարչապետից վերջացրած
Արագածոտնի մարզի Վարդենուտ գյուղի բնակիչներն այսօր առավոտից փակել են Երևան–Ապարան ճանապարհը՝ բողոքելով կառավարության որոշման դեմ։
«Մեր վարչապետն ասել է՝ հարցը լուծելու համար ճանապարհ փակեք, մենք էլ առաջնորդվում ենք վարչապետի ասածով: Հունվարից մինչեւ հիմա նայում են մեր աչքերի մեջ ու խաբում են՝ նախարարից սկսած, վարչապետից վերջացրած»,- ասաց բնակիչներից մեկը։
Ոստիկանության ծառայողները, ՏԻՄ իշխանությունները համոզում են բնակիչներն բացել ճանապարհը։
Կառավարության որոշմամբ հավանություն է տրվել «ՌԻԴ» ՍՊԸ կողմից ներկայացված` ամառային և ձմեռային զբոսաշրջային, լեռնադահուկային, էկոգյուղատնտեսական արտադրության կենտրոնի ստեղծման և ջրամբարի կառուցման «Արագած» ներդրումային ծրագրին, ինչի համար Վարդենուտ գյուղի հողատարածքներից հանրային գերակա շահ է ճանաչվել 110 հա հողատարածք եւ գյուղացիները զրկվել են իրենց հողերից։