Լիբանանում միջնորդավորված բանակցություններ են` նախագահի ընտրության շուրջ.Գանտահարյան
Այս պահի դրությամբ Լիբանանում իրավիճակը կարող ենք բանաձևել հետևյալ կերպ՝ հարավային հատվածում սահմանափակ ռազմական գործողություններ, քաղաքական անորոշություն և միջնորդավորված բանակցություններ` նախագահի ընտրության շուրջ: Երկրում կարելի է ասել, որ բավական անորոշ իրավիճակ է, իսկ հարավային հատվածում ռազմական գործողությունները շարունակվում են, - «Փաստինֆո»-ին ասել է Լիբանանի «Ազդակ» օրաթերթի գլխավոր խմբագիր Շահան Գանտահարյանը:
Լայնածավալ պատերազմի վտանգ վերաբերյալ «Փաստինֆո»-ի հարցին ի պատասխան Գանտահարյանը նշեց, որ օրեր առաջ «Հզբոլլահը» հրապարակել է Իսրայելի տարածքում «Sky on» հենակետերի ընդհանուր քարտեզը, ինչը հանգեցրել է բավական սուր հռետորաբանության, փոխամբաստանությունների ու սպառնալիքների:
«Նման սպառնալիքները ռազմական սահմանափակ գործողությունները կարող են վերածել լայնածավալ գործողությունների` ամբողջ Լիբանանի տարածքում, և ոչ միայն ողջ Լիբանանի տարածքով, այլև նույնիսկ տարածաշրջանային կարող էին դառնալ: Ընդհանրապես քաղաքական վերլուծաբաններն այս բոլորը կապում են նաև ներիսրայելյան լարված իրավիճակի հետ: Իսկ Լիբանանում մարդիկ պատերազմ չեն ուզում:Ժողովրդային մոտեցումն այն է, որ իսրայելյան պատերազմին չպետք է Լիբանանը ներգրավվի, բայց միաժամանակ կա նաև դիմադրության շրջանակի որոշ խավ, որն ուզում է հակազդել իսրայելյան ոտնձգություններին:Կարծում եմ, որ սպառնալիքների այս փուլը կանցնենք և չեմ կարծում, որ ռազմական գործողություններն ավելի մեծ լայնածավալ տարողություն կստանան, սա փոխհակակշռման ընդհանուր տրամաբանության պարունակում կարող ենք ընկալել» , -ասաց Գանտահարյանը:
Ըստ նրա` մինչ այդ նաև որոշակի անհանգստություն կար, քանի որ օտարերկրյա դեսպանությունները իրենց քաղքացիներին զգուշացնող հաղորդագրություններ էին հրապարակել:Հետո նաև ապատեղեկատվություն էր տարածվել, որ բազմաթիվ պետությունների դեսպանություններ իրենց քաղաքացիներին հորդորում են շտապ լքել Լիբանանը ինչը հերքվեց: Գանտահարյանը նաև անորոշ համարեց ներքաղաքական իրավիճակը` նախագահի ընտրության հարցով:
«Քաղաքական առումով անորոշ է դեռևս նախագահի ընտրության հարցը: Կան միջնորդավորված աշխատանքներ` հատկապես արևմուտքի կողմից և որոշ արաբական երկրների կողմից, սյս պահի դրությամբ իրավիճակը աա է»,- ասաց «Ազդակ» օրաթերթի գլխավոր խմբագիր, վերլուծաբան Շահան Գանտահարյանը:
Աղբյուր` Փաստինֆո