Լուսաձայնային նռնակ շատ են նետել, որովհետև հարձակվել են ոստիկանության վրա. Ալեն Սիմոնյան
Ուզում եք ասել, որ այն, որ ցուցարարները հարձակվել են ոստիկանների վրա, ջարդուխուրդ արել Սիրահարների այգին՝ բավարար առիթ չի որ ոստիկանությունը կարգի՞ հրավիրի այդ մարդկանց։
Ոստիկանությո՞ւնն է հարձակվել մարդկանց վրա։ Այս մասին ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը։ Նկատենք, որ իրականում բազմաթիվ տեսանյութեր կան, որոնց համաձայն պենց կարմիր բերետավորներն են վայրենաբար ծեծում քաղաքացիներին, ոտքերով հարված գետնին ընկած քաղաքացիներին՝ վնասելով այգու գույքը։
«Բագրատ Գալստանյանի կոչով ու պատգամավորների ներսի հրահրմամբ է տեղի ունեցել դա։ Պատգամավորները այստեղ դրանով էին զբաղված։ Զարմանալի չէ՞, որ նիստերի չեն գալիս, այդ օրը հարցեր են գրանցում ու ուղղակի ղժղժում էին ու վիրավորում։ Դա կազմակերպված սադրանք էր, երբ հարձակվում են ոստիկանության վրա՝ ոստիկանությունը պետք է պաշտպանվի։ Փասք աստծո որ բացի նռնակը նետող քաղաքացուց բացի ոչ մի լուրջ վնասվածք չի եղել»։
Ինչ վերաբերում է լուսաձայնային նռնակ օգտագործելուն՝ Սիմոնյանն ասաց, որ այն չի օգտագործվել այնտեղ, որտեղ շատ մարդ կար հավաքված։ «Օգտագործել են այն ուղղությամբ, որտեղ պետք է օգտագործեր։ Այլ տեղ չուներ էլ օգտագործելու, ԱԺ բա՞կ նետեր։ շատ են նետել, որովհետև հարձակվել են ոստիկանության վրա»,-ասաց նա՝ ընդգծելով, որ ժամանակին ինքը ևս վիրավորվել է լուսաձայնային նռնակից։
Նրա փոխանցմամբ՝ պայմանավորվածություն է եղել ընդդիմադիր պատգամավորների միջև, որ իրենք հատուկ ժամանակ ձգեն։ «Ամեն ինչ արեցին, որ այստեղ ծեծկռտուք սկսվի, մենք ամեն ինչ արեցինք, որ դա տեղի չունենա։ Հրմշտոց եղավ, դա օգտագործվեց, ու ժողովրդին դրդեցին հարձակման ոստիկանության վրա»,- ասել է Ա. Սիմոնյանը՝ նշելով, որ նպատակը նոյեմբերի 9-ի կրկնությունն էր։
Աղբյուր` Փաստինֆո