Կամ մշակութային հրաշք, կամ պարային հրավառություն․ «Բերդ» պարային անսամբլը ելույթ կունենա Գյումրիում. նկարներ

Հոկտեմբերի 28-ին Գյումրու դրամատիկական թատրոնում մեծ հանդիսավորությամբ ու պարային հրավառությամբ կնշվի աշուղ Շերամի 160-ամյակը․ գաղափարը ծնվել է «Շիրակի էսքիզներ» հեռուստափառատոնի առանցքում։ Նախորդ տարի Գյումրիում ծնունդ առած փառատոնը հանրապետության պարային համույթներին ներկայանալու հարթակ տրամադրելուց եւ ազգային պարարվեստի զարգացմանը նպաստելուց բացի իր առջեւ նպատակ է դրել յուրաքանչյուր եթերաշրջան ավարտել գալա-համերգով ու հստակ վերջնարդյունքով․ մասնակից պարային համույթները հանձնարարություն են ստանում բեմադրել  նոր ու լավ իմաստով պարտադրված բեմադրություններ այն երգահանի երաժշտությամբ ում նվիրված է եթերաշրջանը․ Խաչատուր Ավետիսյանից ու  Սայաթ-Նովայից հետո հերթը  Շերամինն է։ Փառատոնի շերամյան գալա-համերգին մասնակցում է 17 պարային համույթ՝ Երեւանից, Չարենցավանից, Ավոբյանից, Ստեփանավանից ու հանրապետության այլ համայնքերից։ Էսքիզյան իրարանցման մասնակիցներին կողջունի «Բերդ» պարային անսամբլը․ Հայաստանի ազգային պարարվեստի եւ պարագետների միության նախագահ, ՀՀ մշակույթի վաստակավոր գործիչ, «Բերդ» պարային անսամբլի գլխավոր պարուսույց Կարեն Գեւորգյանը  Գյումրիում էր նաեւ հոկտեմբերի 8-ին՝ «Շիրակի էսքիզներ» հեռուստափառատոնի 4-րդ եթերաշրջանի մրցույթի ժյուրին նախագահելու նպատակով։ Երեւան, Աբովյան, Էջմիածին, Ստեփանավան, Առինջ, Արթիկ եւ Գյումրի համայնքներից  թվով 14 պարային համույթների  ազգային պարերի կատարումներից հետո Կարեն Գեւորգյանը այսպես բնութագրեց փառատոնն ու կատարվածը․ -«Շիրակի էսքիզներ» հեռուստափառատոնի 4-րդ եթերաշրջանը ստացված է։ Մի բառով եթե բնութագրեմ՝ կամ մշակութային հրաշք, կամ պարային հրավառություն։ Շատ դարեր առաջ, երբ դեռ չկար հայոց գիրը, հայի ոգին ապրել է պարի մեջ՝ դառնալով մեր ազգային ինքնության ամենավառ կերպերից մեկը, դա է պատճառը, որ մեր ոգեղենիկ պարերը եկել հասել են մեզ՝ որպես մեր միասնության եւ ինքնության խորհուրդ։ Այսօր մեր երեխաները պարարվեստի ողջ ներկապնակով ներկայացան մեզ ու տեղին է ծափահարել բոլոր մասնակիցներին ու գեղարվեստական ղեկավարներին՝ մաղթելով նրանց նորանոր հաջողություններ՝ ի փառս մեր մշակույթի եւ Հայաստան աշխարհի․․․ բռավո ձեզ․․․ «Բերդ» պարային անսամբլի մասնակցությունն ու  Կարեն Գեւորգյանի ներկայությունը հեռուստափառատոնի գալա-համերգին որքան սպասված, այնքան էլ պարտավորեցնող հանգամանք է․ «Շիրակի էսքիզներ»-ը դեռ երկու տարեկան էլ չկա, բայց կարողացել է իր շուրջն համախմբել հայկական պարաշխարհի ամենաերեւելի անուններին, որոնց ներկայությունն անգամ ստիպում է զարգանալ ու գնալ առաջընթացի ճանապարհով։ Հոկտեմբերի 28-ին մոտ 200 հայուհի Գյումրու դրամատիկականում նազանքի, նրբագեղության ու հեզաճկուն պարի վարպետության դաս է խոստանում՝ շերամյան երաժշտությամբ։ Լիլիթ Թովմասյան