Այս մի ստի բուրգն էլ փլվեց

Անցած տարվա մայիսի 22-ին հրավիրված մամուլի ասուլիսի ժամանակ Նիկոլ Փաշինյանն իր հերթական «աննախադեպ» արձանագրումն արեց։ Ինչպես միշտ, արեց ու անցավ առաջ, այլևս մոռացավ։

Իսկ թե ինչ եղավ հետո, հիմա կտեսնեք։

Ասուլիսում Նիկոլ Փաշինյանը հայտարարեց, որ «2023թ. առաջին չորս ամիսների ընթացքում Հայաստանում ծնվել է 11926 երեխա, ինչը 1401-ով ավելի է, քան 2022թ. առաջին չորս ամիսներին, 532-ով ավելի է, քան 2021թ. առաջին չորս ամիսներին, 1469-ով ավելի է, քան 2020թ. առաջին չորս ամիսներին, 1415-ով ավելի է, քան 2019թ. առաջին չորս ամիսներին, 1180-ով ավելի է, քան 2018թ. առաջին չորս ամիսներին»։ Ուզում էր ասել, որ ծնելիության ավելացումը իշխանությունների քաղաքականության ու ապագայի նկատմամբ քաղաքացիների վստահության արտահայտությունն է։

Այս հայտարարությունից ուղիղ մեկ տարի անց ունենք այն, որ ծնելիությունը Հայաստանում կտրուկ նվազել է։

Բայց մինչ դրան անդրադառնալը, նշենք, որ անցած տարի, երբ Նիկոլ Փաշինյանը ծնելիության մասին էր խոսում ու վերամբարձ հայտարարություններ անում, կեղծ թվեր էր հրապարակում։

Անցած տարվա առաջին չորս ամիսներին Հայաստանում ամենևին էլ 11926 երեխա չէր ծնվել։

Շատ ավելի քիչ էր ծնվել։ Նիկոլ Փաշինյանը կեղծում էր իրականությունը։

Իրականությունն այն էր, որ պաշտոնական վիճակագրության ավելի ուշ հրապարակած տվյալներով, Հայաստանում ոչ թե 11926, այլ 11379 երեխա էր ծնվել՝ 547-ով ավելի քիչ, քան հայտարարում էր Նիկոլ Փաշինյանն ու համեմատություններ անցկացնում նախորդ տարիների հետ՝ ցույց տալու արձանագրած հաջողությունները։

Հետո, իհարկե, 11379-ը դարձավ 11425, բայց դրանից իրականությունը շատ չփոխվեց։

Երկու դեպքում էլ մեծ շեղում կար՝ առնվազն 500-ով, Նիկոլ Փաշինյանի ու պաշտոնական վիճակագրության հրապարակած թվերի միջև։

Անցած տարվա առաջին չորս ամիսներին, պաշտոնական տվյալներով, Հայաստանում նույնիսկ ավելի քիչ երեխա էր ծնվել, քան 2021թ.։

Բայց դա չէր խանգարում, որպեսզի Նիկոլ Փաշինյանը՝ կեղծելով ծնունդների թիվը, հայտարարեր, թե իբր 2023թ. առաջին չորս ամիսների ընթացքում Հայաստանում ծնվել է 11926 երեխա, ինչը 1401-ով ավելի է, քան 2022թ. առաջին չորս ամիսներին, 532-ով ավելի է, քան 2021թ. առաջին չորս ամիսներին, 1469-ով ավելի է, քան 2020թ. առաջին չորս ամիսներին, 1415-ով ավելի է, քան 2019թ. առաջին չորս ամիսներին, 1180-ով ավելի է, քան 2018թ. առաջին չորս ամիսներին:

Հիմա տեղափոխվենք այս տարի։

Այս հայտարարությունից մեկ տարի անց պաշտոնական վիճակագրությունը հրապարակել է այս տարվա առաջին չորս ամիսների ծնելության ցուցանիշները, որոնք, մեղմ ասած, հուսադրող չեն։ Ծնելիությունը նախորդ տարվա, և ոչ միայն նախորդ տարվա համեմատ, էապես նվազել է։

Նիկոլ Փաշինյանի հերթական կեղծ արձանագրումների բուրգը փլվեց։

Պաշտոնական տվյալներով, 2024թ. առաջին չորս ամիսներին Հայաստանում 10547 երեխա է ծնվել՝ 7,7 տոկոսով ավելի քիչ, քան անցած տարի։

Անցած տարի, ճշգրտված տվյալներով, ծնվել էր 11425 երեխա, այս տարի ծնվել է 10547 երեխա։

Ծնունդների թիվը 878-ով կրճատվել է։

Այս մասին Նիկոլ Փաշինյանը հիմա չի խոսում, չի ասում, թե այս թվերն ի՞նչ ուղերձներ են հղում իշխանություններին ու իրենց իրականացրած քաղաքականության վերաբերյալ։

Այս տարի Հայաստանում ոչ միայն անցած տարվանից, այլև 2022թ. առաջին չորս ամիսներից է ավելի քիչ երեխա ծնվել։

Այս տարի ծնվել է 10547 երեխա, 2022թ. ծնվել էր 10687 երեխա՝ 140-ով ավելի շատ, քան այս տարի։

Այս տարի ծնվածների թիվն անհամեմատ ավելի քիչ է նաև 2021թ. համեմատ։

Այն ժամանակ ծնվել էր 11501 երեխա, այս տարի ծնվել է 10547 երեխա՝ 954-ով ավել, քան այս տարի։

Մինչ կառավարությունն իբր ծնելիության խթանման քաղաքականություն է իրականացնում՝ ծնելիությունը Հայաստանում կրճատվում է։ Փոխարենը՝ մահերն են ավելանում։

Այս տարվա առաջին չորս ամիսներին Հայաստանում 543-ով ավելի շատ մարդ է մահացել։

Պաշտնական տվյալներով, անցած տարի մահացել էր՝ 8722, այս տարի՝ 9265 մարդ։

Մահացածների քանակը 6,2 տոկոսով ավելացել է։

Սա էլ Նիկոլ Փաշինյանի ու իր իշխանության բերած՝ լավ ապրելու, անհոգ ու երջանիկ ապագայի արտահայտությունն է։

Բնակչության բժշկական ծառայությունների բարելավումից, հատկացվող գումարների աննախադեպ ավելացումներից են խոսում, իսկ արդյունքն այն է, որ անխտիր բոլոր հիվանդությունների գծով մահացություններն ավելացել են։

Թե ո՞ւր են գնում այդ գումարները, ինչի՞ վրա են ծախսվում, երբ դրանից առողջապահական խնդիրները չեն լուծվում, հիվանդություններից ավելի շատ մարդիկ են մահանում, դա էլ մեկ այլ թեմա է, որի մասին գերադասում են չխոսել։

Այս ամենի ուղղակի հետևանքն այն է, որ Հայաստանում բնակչության բնական հավելաճն է կրճատվում՝ 53 տոկոսի անկում է գրանցվել։

Անցած տարվա առաջին չորս ամիսներին բնակչության բնական հավելաճը, խոսքը ծնվածների և մահացածների տարբերության մասին է, կազմել էր 2703, այս տարի կազմել է 1282 մարդ։ Ավելի քան կրկնակի պակաս։

Այսպես էլ պատրաստվում էին բնակչության թվաքանակն ավելացնել և մինչև 2050թ. հասցնել 5 միլիոնի, ինչպես մի քանի տարի առաջ հայտարարում էր Նիկոլ Փաշինյանը։ Այն պարագայում, երբ միջազգային հեղինակավոր կառույցների գնահատականները տրամագծորեն հակառակն են. կանխատեսում են, որ 2050թ. Հայաստանի բնակչության թվաքանակը կկազմի 2,3 միլիոն։ Եվ սա պատահական չէ, երբ տեսնում ենք, թե ինչ է կատարվում այսօր Հայաստանում ժողովրդագրական իրավիճակի առումով։

ՀԱԿՈԲ ՔՈՉԱՐՅԱՆ

168.am