Գազալցակայանի տարածքում տեղի ունեցած պայթյունից տուժած քաղաքացիներից երկուսն ունեն մարմնի մակերեսի 60 տոկոս և ավելի այրվածքներ՝ թոքերի ախտահարմամբ․ Հովհաննիսյան
Գազալցակայանի տարածքում տեղի ունեցած պայթյունի հետևանքով տուժած քաղաքացիներից երկուսն ունեն մարմնի բավականին մեծ՝ ավելի քան 60% մակերեսի այրվածքներ՝ թոքերի ախտահարմամբ։ Նրանք գտնվում են վերակենդանացման բաժանմունքում, վիճակը ծայրահեղ ծանր է գնահատվում, պայքար է գնում կյանքի համար։ Այս մասին «Փաստինֆո»-ի հետ զրույցում ասաց Այրվածքաբանության և մաշկաբանության ազգային կենտրոնի տնօրեն Հովհաննես Հովհաննիսյանը։
Հովհաննիսյանը հայտնեց, որ ընդհանուր առմամբ յոթ բուժառու են ընդունել՝ այրվածքներով, որոնցից մեկի վիճակը թեթև է եղել, ամբուլատոր սպասարկումից հետո դուրս է գրվել, չորս բուժառու գտնվում է բաժանմունքում, վիճակը գնահատվում է միջին ծանրության՝ կայուն։
Նրա փոխանցմամբ՝ այս պահին դեռևս չեն կարող ասել, թե ինչպես է գնահատվում այրվածքների խորությունը, քանի որ դեռ պետք է վիրակապություններն ամբողջ ծավալով արվեն՝ խորության գնահատման համար։
«Նախնական տվյալներով՝ վերակենդանացման բաժանմունքում գտնվողների մոտ 3-4-րդ աստիճանի այրվածքներ են, բաժանմունքում գտնվողների մոտ՝ 1-2 աստիճանի ՝ առավել մակերեսային»,- ասաց Հովհաննիսյանը՝ հավելելով, որ այրվածքների ժամանակ հիվանդների վիճակը պետք է գնահատել 6-7-րդ օրը, երբ թունավորումը հասնում է առավելագույնի, ուստի՝ այժմ ինչ-որ կանխատեսումներ անելը ճիշտ չէ․ «Բնականաբար ամեն ինչ արվում է, որ կրիտիկական վիճակի չհասնենք, բայց նույն Ստեփանակերտի դեպքերը, ընթացիկ փորձը ցույց է տալիս, որ այն, ինչ տեսնում ենք սկզբում և այն, ինչ կլինի 5-6- րդ օրերին, մի փոքր տարբերվում է։ Սովորաբար այդ օրերին հիվանդների վիճակը վատթարանում է»։
Հիշեցնենք, որ հունիսի 6-ին՝ ժամը 23։10-ի սահմաններում Երևան-Սևան ճանապարհին գտնվող գազալցակայանում տեղի էր ունեցել պայթյուն, բռնկվել էր հրդեհ։ Ըստ նախնական տվյալների՝ Երևան-Սևան մայրուղու 6/1 հասցեում գտնվող «Գազօիլ» ՍՊԸ-ի գազաբենզալցակայանում տեղի է ունեցել հեղուկ գազի ցիստեռնի (37 տ) պայթյուն՝ հրդեհի բռնկումով:
Գազալցակայանի տարածքում տեղի է ունեցել 3 հեղուկ գազի (յուրաքանչյուրը՝ 37 տ), 1 դիզելի (8 տ) և 1 բենզինի (12 տ) ցիստեռներից արտահոսք՝ հրդեհի բռնկումով:
Այրվել են «Mercedes» և «Opel» մակնիշի ավտոմեքենաներն ամբողջությամբ, կցորդիչով բեռնատարի վարորդի խցիկը՝ ամբողջությամբ, «Zil» մակնիշի բեռնատարի ցիստեռնը, մեկ այլ գազի ավտոցիստեռնի վարորդի խցիկը՝ ամբողջությամբ, ջերմահարվել է «BMW» մակնիշի ավտոմեքենայի ձախակողմյան հատվածը:
Այրվել են լցակայանի տանիքի կառուցատարրերը (մոտ 120 քառ/մ), պատուհաններն ու դռները, վնասվել են մոտակայքում գտնվող սառնարանները, այրվել է վարչական շենքի տանիքը (մոտ 150 քառ/մ), վնասվել է գույքը, հարակից շինանյութի պահեստի հետնամասում գտնվող տարածքում այրվել են մոտ 40 քառ/մ կուտակված թափոններ։ Դեպքի հետևանքով տուժել է 7 քաղաքացի։
ՀՀ ՔԿ-ն հայտնել է, որ դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 172-րդ հոդվածի 2-րդ մասով (երկու կամ ավելի անձանց առողջությանը անզգուշությամբ ծանր վնաս պատճառելը), 356-րդ հոդվածի 2-րդ մասով (պայթյունավտանգ օբյեկտներում անվտանգության կամ աշխատանքի պաշտպանության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք), 357-րդ հոդվածի 2-րդ մասով (hրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք), 358-րդ հոդվածի 2-րդ մասով (դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք) և 412-րդ հոդվածի 2-րդ մասի 2-րդ կետով (անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը, որն անզգուշությամբ առաջացրել է մարդու մահ, առողջությանը ծանր վնասի պատճառում կամ այլ ծանր հետևանք)։ Նշանակվել են դատահրդեհատեխնիկական դատապայթյունատեխնիկական, դատաշինարարատեխնիկական և դատաապրանքագիտական համալիր ու դատաբժշկական փորձաքննություններ:
Հեղինակ՝ Իզաբել Սահակյան
Աղբյուր` Փաստինֆո