Ահազանգ. կրկին սպիտակագլուխ անգղի որսի դեպք

EcoNews.am  բնապահպանական տեղեկատվական կայքը հայտնում է, որ համացանցում հայտնաբերվել է ապօրինի որսի հերթական դեպքը: Այս անգամ ևս խոսքը Կարմիր գրքում գրանցված սպիտակագլուխ անգղի որսի մասին է: Նշվում է, որ սպանված անգղի նշված լուսանկարը համացանց է բեռնվել 2014-ին, իսկ նկարագրության մեջ գրված է տեղանքի անունը՝ «Բախչալար»: Բախչալարը ներկայիս Բագարան համայնքի պատմական անվանումն է, որը գտնվում է Արմավիր մարզում, մարզկենտրոնից 39 կմ հարավ-արևմուտք, Ախուրյանի գետաբերանի մոտ: Ինչպես լրատվամիջոցի հետ զրույցում նշել է թռչնաբան Լյուբա Բալյանը, այդ տարածաշրջանում կան անգղերի գաղութներ: «Բագարան և Երվանդաշատ համայնքներում շատ են նման դեպքեր գրանցվում»,- ասել է նա: Տվյալ անձը ևս որսի սիրահար է և ունի բազմաթիվ լուսանկարներ այդ մասին վկայող: Ի դեպ, սպանված անգղի հետ լուսանկարը հրապարակվել է մեկ այլ (ոչ լուսանկարում պատկերված) օգտատիրոջ էջում, հավելում է կայքը: Հիշեցնենք՝ նախորդ աղմկահարույց դեպքից հետո ոստիկանությունը հայտնել էր, որ քրեական գործի հարուցումը մերժվել է ՀՀ քրեական դատավարության օրենսգքրի 35 հոդվածի 1-ին մասի 6-րդ կետով (Քրեական գործ չի կարող հարուցվել, եթե անցել են վաղեմության ժամկետները):