Խորամանկ միջոցներով մարդկանց թասիբի են գցում. հոգեբան
Այսօր Հայելի ակումբում կայացած ասուլիսի ժամանակ հոգեբան Սամվել Խուդոյանը սպառողներին առաջարկեց սուպերմարկետներում գնումներ կատարելիս ուշադիր և զգույշ լինել: Նրա խոսքով՝ կան կարևոր հանգամանքներ, որոնք գնումներ կատարելու ժամանակ սպառողները պետք է հաշվի առնեն՝ մանիպուլյացիաներից խուսափելու համար: « Խանութներում կան արդեն որոշակի ապրանքներ, որոնք կշռված, պատրաստի դրված են լինում: Դրանք վերցնում ես, վերակշռում և տեսնում, որ 5 կամ 10 գրամ պակաս է: Սա արդեն իսկ ակնհայտ խաբեություն է, որը շատ հաճախ է հանդիպում սուպերմարկետներում: Ակնհայտ խաբեություն է նաև այն, որ շատ դեպքերում ժամկետն անց մթերքը կամ կաթնամթերքը դնում են առաջնային , տեսանելի հատվածներում, իսկ ժամկետի մեջ գտնվող ապրանքները՝ ետ»,-շեշտեց հոգեբանը: Ըստ պարոն Խուդոյանի՝ սպառողները պետք է ուշադիր լիինեն նաև դրամարկղի մոտ վճարումներ կատարելու կամ խանութի աշխատակիցների հետ խոսելու ժամանակ, քանի որ շատ հաճախ մանիպուլյացիայի ենթարկվելով, սպառողը պատրաստ է լինում գնել նախատեսվածից ավել ապրանքներ, որոնք շատ դեպքերում կարող են պարզապես հին կամ հետագայում պետքական չլինել: «Աշխատակիցները հոգեբանական խորամանկ միջոցներով մարդկանց թասիբի են գցում ՝ այս կամ այն ապրանքը գնելու համար»,-նկատեց հոգեբանը:
Հետևեք մեզ Viber-ում
