Լոռու մարզպետարանը կեղծ է որակում իր իսկ տարածած հայտարարությունը՞
Լոռու մարզպետարանը քիչ առաջ հայտարարություն է տարածել ու կեղծ որակել այն տեղեկատվությունը, որ աղետի պատճառ է հանդիսացել «ՁորաՀԷԿ»-ի ջրընդունիչից ջրի բացթողումը ու պնդում, որ այն չի համապատասխանում իրականությանը:
Ավելին, «կեղծ» լուրերը շրջանառող օգտատերերին և լրատվամիջոցներին հորդորում են զերծ մնալ չհիմնավորված տեղեկատվության տարածումից և ստեղծված իրավիճակում չառաջացնել ավելորդ խուճապային տրամադրություններ:
Նշենք, որ «ՁորաՀԷԿ»-ի ջրամբարի կողմից ջրի բացթողումների մասին հայտարարել էր հենց Լոռու մարզպետարանը՝ 2024 թվականի ապրիլին ու զգուշացրել վարարումների մասին, ինչն էլ այսօր հիշեցրել էինք՝ առանց որեւէ պնդման, որ վարարումները հենց ջրի բացթողումների հետեւանքով են եղել, այլ հետաքրքրվել էինք, որ թե ինչ քայլեր է արել մարզպետարանը՝ հնարավոր վարարումների մասին հայտարարությունը տարածելուց բացի։ Այս հարցադրումը դուր չի եկել մարզպետարանին ու կեղծիքի մեջ մեղադրում իրենց իսկ հայտարարության հիշեցումը։
Հարցի վերաբերյալ պարզաբանմամբ հանդես է եկել նաեւ «Ձորագետ Հիդրո» ՍՊԸ գլխավոր ինժեներ Արա Հակոբյանը: Նա նշել է. «Հեղեղի ընթացքում ՁորաՀԷԿ-ը աշխատել է և այսօր էլ շարունակում է աշխատել բնականոն ռեժիմով, ընդ որում առավելագույն ծանրաբեռնվածությամբ։ Մայիսի 26-ին, ինչպես նաև նախորդող օրերին էլեկտրաէներգետիկական համակարգը գործել է բնականոն ռեժիմով, խափանումներ չեն գրանցվել։
Մայիս ամսին, ներառյալ մայիսի 26-ը, ՁորաՀԷԿ-ի շահագործումն իրականացվել է առանց ընդհատումների, ինչը նշանակում է, որ վթարային ջրբացթողումներ չեն եղել։
Նշեմ նաև, որ ՁորաՀԷԿ-ի օրական կարգավորման ջրամբարի տարողությունը տվյալ ժամանակահատվածում կազմել է մոտ 20 հազար խմ, ինչն անհամադրելի է գետի վարարած հունով հոսող ջրի ծավալի հետ և որևէ ազդեցություն չէր կարող ունենալ նման մասշտաբի տարերային աղետի վրա»։
«Ինչ վերբերում է Լոռու մարզպետի աշխատակազմի ֆեյսբուքյան էջում ապրիլի 19-ին հրապարակված հայտարարությանը, ապա նման նախազգուշացումներ «Ձորագետ Հիդրո» ՍՊԸ-ի կողմից արվում են յուրաքանչյուր տարի՝ հորդորելով ափամերձ վայրերում բնակվող քաղաքացիներին զգոնություն ցուցաբերել գետի վարարման ժամանակահատվածում»,- նշված է հայտարարության մեջ: