Ի՞նչ կապ ունի Սրբազանի սենյակում գաղտնալսող սարք տեղադրող կինը Արթուր Երոյանի հետ

Երեկ ականատես եղանք, թե ինչ տեղի ունեցավ Ani Grand Hotel Yerevan հյուրանոցում հաստատված Բագրատ Սրբազանի համարում։ Գտնվելով սենյակում՝ Սրբազանն ու նրա կողմնակիցները լսել են, թե ինչպես է ներքևի հարկից ոմն մեկը ծակում սենյակի հատակը, որպեսզի այդ անցքից լսողական սարք տեղադրի Սրբազանի սենյակում։

Բագրատ Սրբազանի կողմնակիցները շտապ տեղեկացրել են այդ մասին հյուրանոցի ղեկավարությանը և իջել ներքևի հարկ, որ հասկանան, թե ինչ է տեղի ունենում։ Քիչ անց նույն վայր են եկել ոստիկանության և ԱԱԾ բազում աշխատակիցներ, որոնց մեջ էր նաև Կենտրոնի Ոստիկանության պետի պաշտոնակատարը։ Նրանք նշված սենյակից դուրս են բերել մի կնոջ և արագ հեռացել հյուրանոցից։

Ըստ լուրերի՝ Բագրատ Սրբազանի հյուրանոցային համարը գաղտնալսելու նպատակով ստորին հարկի առաստաղը ծակող և լսող սարք տեղադրող կնոջ անուն ազգանունը Էլեն Աղասյան է: Վերջինս ներկայանում է որպես պաշտպանության նախարարության աշխատակից՝ ենթասպա:

Hayeli.am-ին հայտնի է դարձել, որ այդ կինը աշխատում է ԶՈՒ գլխավոր շտաբի պետի տեղակալ Արթուր Երոյանի «կուրատրության» տակ գտնվող ենթաբաժնում:
Ի դեպ Երոյանը վերջերս ստացել է գեներալ-մայորի կոչում, և նա այն գեներալներից մեկն է, որոնց լուռ համաձայնությամբ Ադրբեջանին հանձնվեցին Տավուշից տարածքներ:

Բագրատ Սրբազանի համարում գործողությունները կատարվել են օրենքի խախտմամբ, քանի որ ՊՆ չի կարող նման գործառույթ իրականացնել իր քաղաքացիների հանդեպ, դա կարող է միայն իրականացվել (եթե դրա համար հիմքեր կան), եթե խնդիրը վերաբերում է թշնամական երկրին, օրինակ՝ Ադրբեջանին:

Սա ցույց է տալիս, որ կա մեծ անվստահություն ԱԱԾ-ի նկատմամբ և նման գործառույթները դրված են ՊՆ-ի վրա:

Ի դեպ սա մեծ զվարճանք է առաջացրել լուրջ կառույցների մոտ, որովհետև իրականացվել է ոչ պրոֆեսիոնալ, կարելի է ասել՝ փնթի աշխատանք: