Ինձ բացակա չդնեք

Երևանի պետական բժշկական համալսարանի հնդիկ ուսանողներն այսօր բացակա չեն ստանա. պատճառը Հնդկաստանում կրակների փառատոնն է: «Հնդկաստանում կրակների փառատոնը սովորաբար տոնվում է հոկտեմբերի վերջին կամ նոյեմբերի սկզբին: Այս տարի այն նշվում է հոկտեմբերի 19-ին: ԵՊԲՀ-ն տոնի առթիվ հնդիկ ուսանողներին պաշտոնապես ազատում է դասերից՝ հարգելով նրանց ազգային և կրոնական առանձնահատկությունները: Շանքարին և Ջանանեյը Հնդկաստանի Չենայ քաղաքից են: ԵՊԲՀ ապագա բժշկուհիները երեկ՝ Դիվալիի նախօրեին համալսարան էին եկել ազգային գեղեցիկ հագուստներով: Օտարերկրացիների ֆակուլտետի 2-րդ կուրսի ուսանողուհիների ուշագրավ տեսքն անմասն չմնաց ոչ միայն օտարազգի, այլև հայ ուսանողների ուշադրությունից: Աղջիկները որոշել էին չխախտել հայրենիքում ձևավորված ավանդույթը և ներկայանալ արդեն հարազատ դարձած բժշկականում հնդկական հարուստ մշակույթը ներկայացնող զգեստներով: «Դիվալի» թագմանաբար նշանակում է «լամպերի շարան»: Տոնի անվանումն արդեն իսկ հուշում է օրը նշելու կերպի մասին, այսպես՝ տոնակատարության մասնակիցները լուսավորում և զարդարում են իրենց տները լապտերներով, ծաղիկներով, մոմերով և էլեկտրական գունավոր լամպերով: Փառատոնը խավարի դեմ լույսի տարած հաղթանակն է խորհրդանշում: Ինչպես Հնդկաստանի մնացած տոները, Դիվալին ևս հիմնված է մի քանի տարբեր առասպելների վրա: Ինչպես ընդունված է ասել «Ուրախ Դիվալի» ենք ձեզ մաղթում, սիրելի ուսանողներ»,- ասված է ԵՊԲՀ Facebook-յան հաղորդագրության մեջ: