ՔԿ-ն պահանջում է կալանավորել Մարտակերտի քաղաքապետին. Վերջինս մեղադրանքը չի ընդունել ու ցուցմունք է տվել

Հայաստանի քննչական մարմինները Արցախի Հանրապետության Մարտակերտի քաղաքապետ Միշա Գյուրջյանին մեղադրում են համայնքի գույքի ենթադրյալ հափշտակության մեջ։ Ընդ որում՝ խոսքը ավտոմեքենայի մասին է, որն էլ ոչ թե հափշտակվել է, այլ՝ ավագանու որոշմամբ հանձնվել քաղաքապետի տնօրինմանը։

Փաստաբան Արսեն Բաբայանի փոխանցմամբ՝ Արցախից պարտադրված տեղահանումից հետո տվյալ գույքի պահպանման համար այլ իրավական հնարավորություն չի եղել, քան հաշվառելը։

«Հաշվառման համար անհրաժեշտ են եղել որոշակի գործողություններ, որոնք իրականացվել են»,- «Փաստինֆո»-ին ասաց Արսեն Բաբայանը՝ նշելով, որ քիչ առաջ քաղաքապետը հարցաքննվել է եւ ցուցմունք, որ իր գործողությունները չեն պարունակում որեւէ քրեական տարր։

«ՔԿ-ն հիմա հանցավոր գործողություններ է համարում ավտոմեքենան պահպանելու նպատակով արված գրանցման գործողությունները։ Հաշվի առնելով նախաքննության գաղտնիությունը՝ շատ փակագծեր բացել չեմ կարող, բայց դրանք գործողություններ են, որոնք անհրաժեշտ են՝ գույքի հետ ցանկացած գործարքի դեպքում», - ասաց փաստաբան Արսեն Բաբայանը՝ նշելով, որ ներկայումս քննչական կոմիտեն պատրաստվում է միջնորդություն ներկայացնել դատարան՝ քաղաքապետի նկատմամբ որպես խափանման միջոց կալանավորումը կիրառելու համար։

«Փաստինֆո»-ն կապ հաստատեց նաև Մարտակերտ քաղաքի ավագանու անդամ Հովիկ Գյուրջյանի հետ, որը փաստեց, որ Երևանում իրենք ավագանու նիստ են հրավիրել ու որոշել՝ մեքենան պահպանության նպատակով քաղաքապետին փոխանցելու համար։

«Դա անհրաժեշտ է, որպեսզի մեքենան շահագործվեր, տուրքեր մուծվեր, անհրաժեշտ որոշում ենք կայացրել և թե ինչի մեջ են հանցակազմ տեսել Հայաստանի քննիչները չգիտեմ» ,- ասաց ավագանու անդամը։

Նշենք, որ նման մեղադրանք է աոռաջադրվել նաեւ Ասկերանի քաղաքապետին, որին եւս կալանավորելու միջնորդություն էր ներկայացրել քննիչը, սակայն դատարանը տնային կալանքն է ընտրել։

Արձագանագրենք, որ թե Ասկերանի, թե Մարտակերտի դեպքում չկա տուժող կողմ, ավելին՝ պարզ չէ, թե ՀՀ քննիչները ինչպես են ՀՀ օրենսդրությունը տարածում են Արցախի քաղաքացիների վրա այն դեպքում, երբ Արցախը ճանաչել են Ադրբեջանի մաս։ Ընդ որում՝ գույքի տնօրինման խնդիրն առաջացել է հենց Արցախի բռնի տեղահանումից հետո, երբ բնակիչները տարբեր մեքենաներով տեղափոխվել են Հայաստան ու Արցախի տարածքային միավորներին ամրակցված շարժական գույքը գրանցվել է քաղաքապետերի անվամբ՝ ավագանիների որոշմամբ, դրանց տնօրինումը օրինական տիրույթում իրականացնելու համար։ ՔԿ-ն իր պաշտոնական հաղորդագրություններում դեռեւս չի ներառել, թե ում է համարում տուժող՝ Ադրբեջանի՞ն, թե Արցախին, որտեղ է տեղի ունեցել իրենց պատկերացրած ենթադրյալ հանցագործությունը ու արդյոք իրենք չեն խախտում ընդդատությունը՝ նման քրգործեր հարուցելով։