Մենք երկրորդ անգամ քրիստոնեություն ենք ընդունելու և դա լինելու է այս մոտ օրերի ընթացքում. Պողոսյան
![Մենք երկրորդ անգամ քրիստոնեություն ենք ընդունելու և դա լինելու է այս մոտ օրերի ընթացքում. Պողոսյան](/timthumb.php?src=/disc/23-05-24/6f2492c47027f380d70b79b6d53640ef.jpg&w=708)
«Հայ Առաքելական եկեղեցին կարողացավ շատ կարևոր ու շատ մեծ գործ անել։Մենք երկրորդ անգամ քրիստոնեություն ենք ընդունելու և դա լինելու է այս մոտ օրերի ընթացքում։ Ես հավատում եմ դրան, սա ոչ միայն պետականության փրկություն է, այլև` կրկին քրիստոնեությունը ընդունելու կարևոր առաքելություն»,- «Փաստինֆո»-ին ասաց գյումրեցի իրավապաշտպան Կարապետ Պողոսյանը։
Նրա փոխանցմամբ՝ Շիրակի թեմի առաջնորդ Միքայել Աջապահյանի հետ մի քանի հանդիպումներ է ունեցել, տեսել նրա վճռականությունն ու կարող է փաստել, որ Շիրակի մարզում շատ շատ մարդիկ կան, որոնք պատրաստ են իրենց ներդրումն ունենալ Հայաստանի փրկության գործում։
«Այստեղ շատ կարևոր դեր կունենա նաև առաջիկայում ժամանակավոր կամ անցումային կառավարության ղեկավարի թեկնածուի հնչեցումը, որը իսկապես իրավիճակ է փոխելու թ՛ե Հայաստանում և թե՛ Շիրակի մարզում»,- ասել է իրավապաշտպանը։
Կ.Պողոսյանի դիտարկմամբ՝ եթե մինչև այս պահը ինչ-որ տեղ մարդկանց մոտ կար հույս, որ հայրենիքի ինչ-որ մաս չի զիջվելու, կամ զիջվելու է միայն Արցախից ինչ-որ մի մաս, ապա հիմա բոլորն էլ հասկանում են, որ Նիկոլ Փաշինյանը հանդիսանում է ադրբեջանական շահերի պաշտպան ու նաև հասկանում են, որ հայրենիքի հետ միաժամանակ այստեղ դրված է արդեն Հայ Առաքելական Սուրբ Եկեղեցու լինել- չլինելու հարցը։Եվ սա շատ կարևոր գործոն է , որպեսզի մենք առաջիկայում կարողանանք մեր հայրենիքն ազատագրված տեսնել և մասնակցել այդ ազատագրական պայքարին։
«Թե ինչ ձևով այս անգամ շիրակցիները կմեկնեն Երևան ես չգիտեմ, կլինեն հատուկ ավտոշարասյուներ, թե այլ բան կմտածեն, բայց վստահ եմ, որ եկող հանրահավաքին՝ մայիսի 26-ին, շատ ավելի մարդու եմ հանդիպելու։ Այս ընթացքում բավականին զանգեր եմ ստանում, շատ է մարդկանց հոսքը մեր գրասենյակ, այսօր բոլորն էլ ցանկություն ունեն, երազանք ունեն՝ հայրենիքն ազատագրված տեսնել, բայց միևնույն ժամանակ մարդիկ նաև օբյեկտիվ և սուբյեկիտիվ պատճառներով որոշակի հավատքի կորուստ ունեն, ոչ թե հավատքի առ Աստված , այլ հավատք առ երկրի իշխանություն և այս առումով, կարծում եմ եկեղեցին կարողացավ շատերի մոտ ստեղծել հենց այդ հավատքը, հույսը, որ մենք կրկին կարողանալու ենք լինել ազդեցիկ , միասնական և ամենակարևորը մեր խոսքն ունեցող պետություն։ Տարածաշրջանում մեր տեղն ունեցող պետություն»,- ասաց Կարապետ Պողոսյանը։